Ji bo şermezarkirina 48. Forûma Aboriyê ya Cîhanê ku duh bi beşdariya gelek serokên dewletan li bajarê Davosê yê Swîsreyê dest pê kir, li gelek bajarên Swîsreyê çalakî hatin lidarxistin. Kurdistanî û dostên wan ên tevlî çalakiyan bûn, bal kişandin ser êrîşên dewleta Tirk ên li ser Efrînê.

LOZAN: Ji bo şermezarkirina civîna bilind a Davosê, bi sedan kes li meydana Lozan Flonê li hev civiyan. Çalakgeran êrîşkariya dewleta Tirk a ji bo dagirkirina Efrînê jî şermezarkirin. Di çalakiyê de dirûşmên "Bijî berxwedana Efrînê", "Kujer Erdogan, Terorîst Tirkiye" hatin qîrîn.

FRÎBOÛRG: Bi sedan kesên li Georges Place ya Frîboûrgê li hev civiyan, hem civîna bilind a Davosê hem jî dagirkeriya dewleta Tirk a li Efrînê şermezar kirin. Piştî vê çalakiyê ciwanên Kurd jî ber bi gara trenê ya navendî ve meşiyan. Di meşê de li dijî dewleta Tirk dirûşm hatin qîrîn û bang li her kesî hate kirin û ji bo Efrînê dakevin qadan.

BASEL: Li bajarê Baselê bi sedan Kurdistanî û dostên wan ên li stasyona trenê ya navendî li hev civiyan, êrîşkariya dagirkeriyê ya dewleta Tirk şermezar kirin. Girseya gel ji bo geşkirina berxwedanê bang kir.

DELEMONT, NEÛCHATEL, AARAÛ: Li bajarên Delemont, Neûchatel û Aaraû yên Swîsreyê, Kurdistanî û dostên wan daketin qadan û berxwedana Efrînê silav kirin. Di çalakiyan de êrîşên dewleta Tirk ên li ser Efrînê hatin şermezarkirin. Kurdistanî û dostên wan ên li Swîsreyê dijîn, wê her êvarê saet 18'an li gelek bajaran dakevin qadan û çalakiyan li dar bixin.