Li Bedlîsê di meha Tîrmehê de nêzî 5 hezar kes bi sedemên êşa zik, verişîn û mehdxelînê çûn nexweşxaneyan. Walîtiya Bedlîsê diyar kir ku mîkrob ketiye xeta ava vexwarinê. Li Bedlîsê 2 sal in qeyûmên xespkar li ser kar in û derket holê ku peywira xwe îxmal dikin.

Waliyê Bedlîsê Îsmaîl Ûstaoglû ji ber vê bûyerê gel sûcdar kir. Walî diyar kir ku ji ber germa zêde zarok û ciwan dikevin avê û zêde avê vedixwin, ev jî dibe sedema nexweşiyan.

Serokê Yekîtiya Tabîban a Tirk (TTB) ê şaxa Bedlîsê Osman Fatîh Şanli jî diyar kir ku hê jî nexweş tên nexweşxaneyan. Şanli diyar kir ku ji ber îxmalkariyê mîkrob ketiye avê û got: “Li navenda Bedlîsê di mehekê de 5 hezar kesan bi nerihetiyên wekî êşa zik, mehdxelîn û verişînê hatin nexweşxaneyan. Walî qebûl kir ku mîkrob ketiye avê lê îxmalê qebûl nake. Em hêvîdar in di nava demeke kurt de, wê tevdîrên pêwist werin wergirtin.”