Tevgera Azadî ya Civaka Kurdistanê ya ku ji aliyê Iraqê ve di asta fermî de wekî partiya siyasî hate naskirin, li gorî zagonan divê di nava 3 mehan de kongreya xwe li dar bixe. Tevgera Azadî ragihand ku ew ê Kongreya xwe ya damezirandinê ya 1’emîn di 19’ê Çileya 2018’an de li dar bixe.

BI BEŞDARIYA 2 HEZAR ENDAMAN

Endama Lijneya Rêveberiyê ya Tevgera Azadî Hisên Kerkûkî ji Rojnewsê re axivî û got, “Piştî serlêdana me ya ji bo Saziya Partiyên Siyasî û Rêxistinan a Iraqê ya di 4’ê Kanûna 2017’an de, li gorî zagona 139’emîn destûra me ya damezirandinê hate dayîn. Li gorî van zagonan divê heta 3 mehan em kongreya xwe ya damezirandinê li dar bixin. Me jî biryar da ku em kongreya xwe di 19’ê Çileya 2018’an de li dar bixin.”

Ew ê 2 hezar endam beşdarî kongreyê bibin û heyeteke Komîsyona Bilind a Hilbijartinê ya Iraqê jî bi peywira çavdêriyê beşdar bibe.

Piştî kongreyê tê payîn ku ofîsên partiyê werin vekirin.

Tevgera Azadî ligel ku li Iraq û Başûrê Kurdistanê bi awayê fermî tê naskirin jî, li Herêma Kurdistanê tê astengkirin.