Li navçeya Sûrê ya Amedê ku di cîhanê de herî zêde demdirêj qedexeya derketina derve lê hat îlankirin, di çarçoveya "Veguherîna bajarvaniyê" de tê xerakirin û xerakirin didome. Navçe 4 roj in di bin dorpêça polîsan de ye. Li taxa Alîpaşa ku ji sedî 80 hatiye xerakirin, 4 roj in polîsan bi bariyeran dorpêç kiriye û ketin û derketina taxê qedexe kirine. Li taxê 20 roj in av û ceyran hatiye qutkirin û  zorê li welatiyan dikin ku navçeyê vala bikin. Lê tevî hemû zextan welatî malên xwe terk nakin.

Îro jî koma ku ji endam û rêveberên Platforma Ji Xerakirina Sûrê re Na, parlamenterên HDP'ê û rêveberên HDP û DBP'ê yên bajar, aktîvîstên TJA'yê li kolana Kûtlûyê kom bûn û çalakiya rûniştinê pêk anîn. Piştî çalakiyê daxuyanî dan û bertekên xwe yên li dijî xerakirinê anîn ziman. Di çalakiyê de Berdevka Platforma Sûrê Busra Cîzrelîoglu, diyar kir ku li taxa Alipaşa bi awayekî fîîlî qedexeya derketina kolanan hatiye îlankirin û xwest her kes li dijî vê yekê dengê xwe bilind bikin. Parlamenterê HDP'ê yê Amedê Nîmetûllah Erdogmûş got ku “Divê her kes li Sûrê xwedî derkeve û ji bo hikûmet û muxalefet dengê platformê bibihîze divê em di nava hewldanê de bin. Kevirê bingehîn ê wijdan e. Divê her kes wî bibihîze û guh bidiyê.”