Komîteya Piştgiriya bi Malbatên Şehîdan a PKK’ê bi daxuyaniyekê şehadeta kadroya PKK’ê Şaha Hisên ya bi nasnav Şaha Dêrik ku di 01’ê Cotmeha 2020’an de li Rojavayê Kurdistanê ji ber nexweşiya penceşêrê şehîd bû bi bîr anî. Komîteyê sersaxî ji malbata wê, Rêberê gelê Kurd Abdullah Ocalan, hevrêyên wê, hemû malbatên şehîdan û gelê Kurd re xwest û soza pêkanîna xeyalên şehîdan dubare kir.

Daxuyaniya komîteyê wiha ye:

“Hevrê Şaha sala 1968’an li gundê Gira Sor Feqe ya girêdayî bajarê Dêrîkê ya Rojavayê Kurdistanê, çavê xwe li dinê vedike. Hevrê Şaha di nava malbateke walatparêz de mezin dibe. Hevrê Şaha ji şehîdên şorêşê û bi taybetî ji şehadeta hevrê Bêrîvan pir bandor bibû, ew bandorbûyîna wê hişt ku tevlî nava şoreşê bibe. Lewre sala 1989’an tevlî nava refên PKK dibe.

‘ERK Û BERPIRSYARIYÊN MEZIN HILDIGIRE’

Girêdanbûna wê ya bi şehîdan û pêkanîna xewn û xeyalên şehîdan yên ku jiyaneke rast dafirîne pir bû. Baweriya Şaha bi şoreşê ew bû ku yekane rêya rizgariyê ye. Hevrê Şaha piştî ku tevlî dibe nêzî du salan di nava gel de kar dike, di nava kar de her dem dixwest ku kesayeta xwe pêş bixe da ku bikare barê berpirsiyartiyên mezin rabike.

‘GIRÎNGIYEK MEZIN DIDA ÇAND Û FOKLORA KURDÎ’

Ji ber kesayeta wê ya dilnizm û nêzîkatiyê wê yê xweş, di demeke nêz de bandoreke mezin li ser gel ava dike. Di heman demê de hevrê Şaha her dem dixwest ku fêr bibe û fêr bike. Girîngiyeke mezin dida çand û foklora Kurdî. Di heman demê de vegotina stranên Kurdî weke pêşxistina çanda Kurdewarî didît, lewma girîngiyek mezin dida wê.

‘HEVRÊ ŞAHA JI BO PERWERDEKIRINA GEL Û RÊXISTINKIRINÊ KEDEKÎ MEZIN DA; BÛ SEMBOLA FEDAYÎTÎ Û DILNIZMIYÊ’

Ji bo ku hê zîdetir partî nas bike û xwe têde kûr bike û di heman demê de xwe bighîne asta kesayeta şoreşgerî, di sala 1991’an de derbasî akademiya Mahsûm Korkmaz dibe. Di nava akademiyê de girîngiyeke mezin dide guherîna kesayetê û famkirina kesayeta Kurd a ku di bin bandora siyaset û pêkanînên sîstemên deshilatdar de ye. Hevrê Şaha bi kedeke mezin karî xwe bigihîne asta famkirina kesayeta şoreşgerî û pêkanîna wê. Bi vî awayî herê Şaha karî di dilê derdora xwe de heskirin qezenc bike. Piştî ku perwerdeya xwe bi serkeftî diqedîne bi heskirineke mezin, bi komek hevrêyên xwe re derbasî saheya Rêbertî dibe. Hevala Şaha bi kesayeta xwe ya xweşik û dilnizm ve evîndarê xweza û çiya bû. Sala 1996’an de careke din tê saheya Rêbertî û sala 2000’an weke mamosteyê zimanê Kurdî zarokên Kurd fêrî zimanê dayikê dike. Her wiha rêya rast nîşanî bi sedan xwendevanên Kurd dike. Piştî vejîna şoreşa Rojava bi ruhekî fedayî tevlî şoreşa Rojava dibe. Hevrê Şaha ji bo perwerdekirin gel û rêxistinkirina wê kedek mezin da. Bi tayîbetî li bajarê Efrînê xebat da meşandin û li wir bû sembola fedayîtî û dilnimziyê.

‘HETA ARMANCÊN ŞEHÎDAN EM Ê NERAWESTIN’

Hevrê Şaha demek bû ku bi nexweşiya penceşêrê re têkoşîn dikir. Piştî meşekî dirêj û bi heybet hevrê Şaha di 1’ê Cotmeha 2020’ê de li Rojavayê Kurdistanê tevlî nava karwanê şehîdan dibe.

Hevrê Şaha ne şehîda yekemîn ya malbatê ye, beriya wê di Tîrmeha sala 1997’an de li Başûrê Kurdistanê li navçeya Hacî Umran jî xwişka wê Sûzan şehîd bûbû.

Weke hevrêyên we soz be hevrê Şaha ku em ê heta dawiyê li ser rêka te bimeşin û heta ku em bighêjin armancê ku tu ji bo wê şehîd bûyî ranewestin.

Di serî de em sersaxiyê ji malabata hevala Şaha, Rêber Apo û hemû malbatên şehîdan û gelê Kurd dixwazin û soza pêkanîna xeyalên şehîdan dubare dikin.”

NASNAMEYA ŞEHÎD

Nasnameya şehîd wiha ye:

Nav û paşnav: Şaha Hisên

Nasnav: Şaha Dêrik

Navê Dayikê-Bav: Fatma- Reşîd

Cih û Dîroka Jidayikbûnê Gundê Girê Sor Feqe-Dêrik/ 10.02.1968

Dîroka tevlîbûnê: 1989

Dîroka derbasbûna welêt: 1991

Cih û Dîroka Şehîdbûnê: Rojava- 01.10.2020