41 Êzidiyên ku sala 2014'an ji aliyê çeteyên DAÎŞ'ê ve hatin qetilkirin û li gorên komî hatin binaxkirin, piştî tespîtkirina nasnameya wan îro bi merasîmekê hatin veşartin.
3'ê Tebaxa 2014'an di dema êrişa qirkirinê ya li ser Şengalê de bi hezaran Êzidî hatin qetilkirin, bi hezaran hatin revandin û di asta koletiyê de li bazaran hatin firotin. Hîn jî aqûbeta bi hezaran kesî nayê zanîn.
Salên dawî gelek gorên komî hatin dîtin. Saziya Tipa Edlî ya Bexdayê nasnameya 41 Êzidiyên ji gora komî hatibûn derxistin, tespît kir.
Cenaze li gundê Koço yê Şengalê 9'ê Mijdarê Roja Bîranîna Qurbaniyên Qirkirinê ya Navneteweyî bi merasîmekê hatin veşartin.
Li Saziya Tipa Edlî ya Bexdayê karên li ser tespîtkirina nasnameya 400 Kurdên Êzidî dewam dike.
Bi wesîleya 9'ê Mijdarê Serokkomarê Iraqê Berhem Salih jî peyamek weşand.
Salih got, "Di Roja Bîranîna Qurbaniyên Qirkirinê ya Navneteweyî de, qurbaniyên komkujiya li dijî Êzidiyan, komkujiya Enfalê, gorên komî û qurbaniyên bombardûmana kîmyewî ya Helebçeyê bi êşeke mezin bi bîr tînin."
