Berxwedana greva birçîbûnê ya li Nûnertiya HDP’ê ya Başûrê Kurdistanê di roja 112’an de ye. Her diçe rewşa tendurisiyê ya Yagiz giran e, lê biryardariya wî û hêviya serketinê hêz û taqeta wî zêdetir dike. Çalakiya grevê ya bêdawî û dorveger ji aliyê koma 56’an a jinan ve hate dewrgirtin.

Di merasîma dewrgirtinê de endama Nûnertiya HDP’ê Muzeyen Guneş, bal kişand ser berxwedana ku Hevseroka KCD’ê û Parlementera HDP’ê Leyla Guven pêşengtiyê ji wê re dike û got ku ”Niha li her derê jin bi hêz û rengê xwe beşdarî çalakiyan dibin.”

Guneş diyar kir ku bi vê çalakiyê re li dijî tecrîd, zilm û gefên Erdogan ên li ser Kurdistanê berxwedaneke mezin ya gelê Kurd tê kirin. Guneş destnîşan kir ku jin li her derê xwedî li çalakiyê derdikevin û anî ziman ku koma 56’an ji aliyê jinan ve hatiye dewrgirtin.

Endama Nûnertiya HDP’ê Muzeyen Guneş serketina jinê ya şervanên YPJ’ê ya li Bakur û Rojhilatê Sûriye bi taybet bidawîkirina DAÎŞ’ê silav kir. Guneş anî ziman ku serketina jinê ya li Dêra Zorê nêzîk e û him ji bo piştgirî û silavê bidin şervanan û ji bo xwedî li pêvajoyê derkevin, koma jinan îro çalakî dewr girtine.