Di danişîna doza Berdevka Demê ya Tevgera Jinên Azad (TJA) Ayşe Gokkan de serokê dadgehê xwestibû parêzer û beşdarên dozê ji eywana danişînê werin derxistin û polîsan mudaxile kiribû. Baroya Amedê têkildarî helwesta serokê dadgehê ya ku îro nîşanî parêzeran da li ber avahiya Edliyeya Amedê protesto kir. Serokê Baroya Nahît Eren, gelek parêzer û aktîvîstên jin beşdarî daxuyaniyê bûn. 

Serokê Baroyê Nahît Eren diyar kir ku qewimandinên îro li dadgehê pêk hatin cihê xemgîniyê ye û parêzeran berê jî derbarê heman serokê şandeyê de gilî û gazin kirine. Eren bal kişand ser tiştên ku hevpîşeyên wî pê re rûbirû mane û got: “Dema ku hevkarên me daxwazên xwe yên ji bo mafê parastinê, ku mafê wan ê herî xwezayî ye, anîn ziman, wan helwestek li hember hevrêyên me bi vî rengî nîşan dan. Serokê dadgehê bi tevgerên xwe nayê qebûl kirin nîşanî hevpîşeyên me da.” 

Eren destnîşan kir ku ew helwest û tevgera serokê şandeya dadgehê ku nîşan daye qebûl nakin û wiha got: “Serokê dadgehê ferman da polîsan. Polîsan hevpîşeyên me avêtin derve. Berê jî gefa ku wê hevalên me ji danişînê derxe xwaribû. Wan hevkarên min, ez jî di nav de, bi milên me ve kaş kirin û me derxistin derve. Di heman demê de heqaretên ku nayên ziman li me kirin. ”

Eren di dawiya axaftina xwe de wiha got: “Em dixwazin ji vir careke din bang li kesên eleqedar bikin. Tu endamekî Baroya Amedê serî li ber van sepanên neheq û neqanûnî natewîne. Em ê têkoşîna xwe ya ji bo hiqûq û edaletê, ku bi salan e didomînin, bidomînin. Em ê her hewl bidin ku hemî mafên xwe yên qanûnî bikar bînin. Ez dixwazim li vir bangî Wezareta Dadê bikim; Ez dixwazim diyar bikim ku tu dadger bi vî celebê darizandinê nikare biryarek dadmend, bêalî û wijdanî bide. Her wiha em daxwaz dikin ku HSK ji bo lêpirsînê bide destpêkirin demildest bikeve tevgerê. Em dixwazin van dadgerên vir hemû baş dizanibin, me tu carî serî netewandiye, em ê serî natewînin.”