Dadgeha Ceza ya Hewlêrê di 16'ê Sibatê de bi îdîaya "xerakirina ewlekariyê û sîxuriyê" 6 sal cezayê girtîgehê li 5 rojnamevan û aktîvîstan birî bû.

Şêrwan Şêrwanî, Şivan Seîd, Guhdar Zêbarî, Eyaz Kerem û Harîwan ên hatin girtin, ji bo biryara girtîgehê û şert û mercên girtîmayinê şermezar bikin, di 17'ê Sibatê de dest bi greva birçîbûnê kirin.

Greva birçîbûnê di roja 21'ê de ye. Eyhan Seîd birayê Şivan Seîd ji Rojnewsê re axivî û got, "3 hefte ne nikarim agahiyê ji Şivan werbigirim, em nizanin ku rewşa wî ya tenduristiyê çawa ye. Her hefteyê divê karibe bi rêya telefonê bi malbata xwe re biaxive. Lê belê 3 hefte ne destûrê nadin ku bi malbata xwe re biaxive."

Parêzerê rojnamevanên Behdînanî Beşdar Hesen Jî got, "Em îro dixwazin serdana girtiyan bikin û rewşa wan zelal bikin. Lê belê hîn nediyar e ku bersiveke erênî yan jî neyînî bidin daxwaza me ya hevdîtinê yan na."