Rêyên li navenda bajarê Şengalê ku di dema hovîtiya çeteyên DAIŞ'ê de hatin xerakirin, ji aliyê gelê Şengalê ve tên sererastkirin.

Projeya ku ev 3 roj in dest pê kiriye û hikkumeta navendî ya Iraqê jî piştgiriyê dide, tê payin ku di nava hefteyekê de biqede û rêyên sereke yên li navenda bajêr bên betonkirin.

Ezîz Silêman ku di nava vî karî de cih digire anî ziman, ku ew niha rêyên hatine xerakirin sererast dikin û got, "Ev bû sê roj ku me dest bi vê projeyê kirine. Dibe ku di nava hefteyekê de biqede. Ji bo gelê xwe çi xebat û proje bê pêşiya me, em ê bikin. Şengal niha ji nû ve tê avakirin."

Silêman destnîşan kir, ku ew bi hêvî ne gelê wan li cih û warên xwe vegere û bi rengekî azad û bi hev re li Şengalê bijîn.

Silêman bi bîr xist, ku 70 ji sedî yê Şengalê bi temamî wêran bûye û bang li hikumeta navendî ya Iraqê û hikumeta herêmî kir, ku ji bo vî karê wan ê ji nû ve avakirinê bibin destek.

Ziyad Hecî jî yek ji karkerên ku betonê li ser rêyê dirijîne. Hecî got, "Em dixwazin her karê baş ji bo gelê xwe bikin. Ev bû 3 sal gelê me derbeder bûye. Pêwîste sazî û dezgehên xêrxwaziyê alîkariya ji nû ve avakirina Şengalê bikin."

Ajokarê wesayita ku betonê dirijîne Bênav Xorşîd anî ziman, ku Şengal gelekî xera bûye û got, "Ji bo avakirina Şengalê heta niha kesî alîkarî nedaye. Lê îro bi alîkariya hikumeta Bexdayê weke ciwanên Şengalê me dest bi sererastkirina rê û kolanan kirin."

Xorşîd jî bang li saziyên mirovahiyê kir ku ji bo jinûve avakirina Şengalê alîkariyê bi wan re bikin.