Tevgera Jinên Kurd a Ewropayê (TJK-E) daxuyaniyeke nivîskî weşand û got ku “Beriya niha 5 salan bi maskeya DAÎŞ’ê êrîşî hemû nirxên mirovayetiyê hate kirin. Jinên Kurd di Tebaxa 2014’an de û di Îlona 2014’an de vê maskeya reş rakirin. Ev têkoşîn di wijdanê mirovayetiyê de jî cihê xwe girt. Şoreşa demokratîk a li Rojava ji hemû cîhanê re bû ronî û hêvî. Bi sedan enternasyonalîstan berê xwe dan ser vê axê û bûn rêhevalên Arîn Mîrkanan. 1’ê Mijdarê roja hevdîtineke wisa bû. Li hemberî êrîşa herî faşîst û paşverû ya dîrokê cîhanê cara pêşîn enîyeke berxwedanê ava kirin. Îro jî li gelek welatên cîhanê gel, jin, ronakbîr, siyasetmedarû tevgerên sosyalîst xwedî li şoreşa Rojava derdikevin.

Di salvegera 5’emîn a 1’ê Mijdarê Roja Kobanê ya Cîhanê de careke din çalakiyên berfireh tên lidarxistin. Em ê jî di 2’ê Mijdarê Roja Rojava ya Cîhanê de ji bo parastina şoreşa jinan li qadan bin. Em bang li hemû femînîst, ronakbîr, rewşenbîr, ekolojîst, anarşîst û rêxistinên jina dikin ku ji bo parastina şoreşa Rojava bila li qadan bin.”