Li paytexta Swêd Stockholmê, di şexsê Ferînaz Xosrewanî de ji bo destek ji jinên li dijî rejîma Îranê têkoşîn were dayîn çalakî hatin lidarxistin.

Çalakiya ji aliyê Dayikên Kurd ên Swêdê û Meclîsa Jinên Kurd a Amara ya Stockholmê li Qada Sergel pêk hat de, alên KJAR, YPJ, PJAK’ê hatin vekirin û dirûşmên piştgiriya bi berxwedana Mahabad û Rojava hatin berzkirin. Meş ji Qada Mynttorget heta Federasyona Jinên Kurd a Rojhilatê Kurdistanê pêk hat. Di meşê de dovîz û pankartên ku dixwestin darvekirin bên rawestandin û girtiyên siyasî bên berdan hatin vekirin.

Ji bo Ferînaz û jinên Kurd ên di têkoşînê de jiyana xwe ji dest dane deqeyek rêz hat girtin û sirûda Neteweyî ya Kurd hat xwendin.

Li ser navê girseyê Ghazal Aliyalî axaftinek kir û bal kişand ser zextên li ser jinan û têkildarî geşedanên dawî yên Îran û Mahabadê de agahî da.

Aliyalî got ku êrîşên li Îran û Rojhilatê Kurdistanê li hember jinê pêk tên di bin agahiya rejîma Îranê de pêk tên û wiha got: “Jin nekarin pergaleke wisa ya serdestiya mêr de xwe di nava ewlehiyê de hîs bikin. Rejîma Îranê bi armanca tirsê di navbera jinan de zêde bike û tecawizê wek heq bibîne, jinan wek amûr bikar tîne. Jin tevî tehdîd, darvekirin û tecawizên rejîmê têkoşîna xwe didomînin.”

Li ser navê Meclîsa Jinana Kurd a Amara a Stockholmê jî Ayşe Goktepe daxuyanî xwend û bal kişand ser piştevaniya bi jinên Kurd ên Îranê re û her wiha diyar kir ku niha bi hezaran jinên Êzidî di destê DAIŞ’ê de ne û wek koleyên seksê tên bikaranîn.

ROJAVA LI DIJ ÊRÎŞAN BÊDENGIN

Li ser navê rêxistina Kurdistan a Komala ya Partiya Komunust a Îranê jî Sadika Muhammed jî diyar kir ku dewletên rojava li dijî zext û zordariyên li ser jinên Kurd û gelê Kurd ên Îranê bêdeng in.

Piştre hunemendê Kurd Necmedîn Gulamî derket ser dikê û stranên xwe striyan. Her wiha bê navber dirûşme hatin berzkirin.

Ll GOTEBORGÊ JI BO FERÎNAZ ÇALAKIYA HEVBEŞ

Li bajarê Goteborgrê jî Navenda Civaka Kurd a Demorkatîk roja Yekşemê wê bi armanca protestokirina rejîma Îranê çalakiyekî pêk bîne. 

Meş wê ji Parka Brunn saet di 14.00’an destpê bike û  ber bi Store Teatern (Şanoya mezin) bimeşin.