Li bajarê Fransa Bordeaûxê, di çarçoveya çalakiyên 25'ê Mijdarê de panelek hat lidarxistin.

Panel li Navenda Çanda Elewiyan a Bordeaûxê pêk hat û Hevseroka Yekîtiya Jinên Sosyalîst Şaxê Ewropayê Esra Demîr weke qiseker beşdar bû.

Panel bi deqeyeke rêzgirtinê ji bo bîranîna Xwişkên Mîrabel û hemû jinên ji ber şîdetê jiyana xwe ji dest dane, destpê kir.

Li dû axaftina vekirinê û nîşandana dokûmantera li ser wateya rojê, Esra Demîr mafê axaftinê wergirt û got, "Mixabin, dîroka têkoşîna jinê weke dîroka komkujiyê tê pênasekirin. Jinên ku li dijî dîktatoran, li hemberî sîstema serdest a mêr û mêtîngeran helwest nîşan dan, li ber xwe dan û têkoşiyan, rastî şîdeta zayendî û komkujiyan hatin." Demîr da xuyakirin ku şîdet bi tenê fîzîkî nîne, aliyên xwe yên ekonomîk, psîkolojîk, zext û destavêtinê hene.

Demîr, têkoşîna jinan a li Kurdistan, Tirkiye û Rojhilata Navînv egto û şerê YPJ'ê yê li dijî çeteyên DAIŞ'ê mînak nîşan da.

Di panelê de gelek mijarên weke "rewşa jinên Êzidî, di hilbijartinên 7'ê Hezîranê û 1'ê Mijdarê de cihgirtina jinan, jinên koçber û penaber, tore, civak û namûs' hatin nirxandin. Esra Demîr li ser van mijaran, bersiv da pirsên beşdaran.

Demîr herî dawî bal kişand ser girîngiya xweparastinê û rê û rêbazên têkoşîna li hemberî şîdeta mêr vegot.