Daxuyaniya Hevserokatiya Konseya Rêveber a KCK’ê bi vî rengî ye:

“Vê siharê desthilatdariya AKP-MHP’ê ya faşîst qeyûm tayînî şaredariyên Êlih, Mêrdîn û Xelfetiyê kir û careke din îradeya gel desteser kir, îradeya gelê Kurd îpotek kiriye. Di qonaxeke ku li Tirkiyeyê çareserî û pêvajoyeke nû tê nîqaşkirin de, car din desteserkirina îradeya gel nîşan daye ku di rastiyê de ti niyeta çareseriyê nîne, tam berevajî zihniyet û siyaseta qirker dewam dike. Êdî bi eşkere diyar bûye ku tiştên bi gotinî tên gotin û bi pratîkê tên kirin, berevajî hevdû ne. Ev jî nîşan dide ku tiştên têne gotin, bi temamî bi armanca xapandinê ne. Desthilatdariya AKP-MHP’ê ne xwedî niyeteke aştî, xwişk-biratî û çareseriyê ye, ne jî planeke wî ya wiha heye. Tam berevajî xwedî zihniyet û siyaseteke ku aştî, xwişk-biratî û çareseriyê tune dike ye. Yek plana wî heye, ew jî plana tasfiye û qirkirinê ye.

Car din desteserkirina îradeya gelê Kurd, niyeta rast a desthilatdariya AKP-MHP’ê û plana wî deşîfre kiriye. Lewma divê ti kes bawerî bi gotinên desthilatdariya AKP-MHP’ê neyîne. Di zihniyeta AKP-MHP’ê de aştî, demokrasî, çareserkirina pirsgirêkan û naskirina îradeyê nîne. Zihniyeta vê desthilatdariyê bi temamî antî demokratîk e. Nîjadperest, faşîst, qirker û xespkar e. Hemû gotinên wî jî di çarçoveya şerê taybet de ne. Bi rêbazên şerê taybet hewl dide hişê civakê têk bibe, civakê bixapîne û teslîm bigire. Gotinên ku ev demeke dibêjin jî, bi vê armancê ne.

Divê gelê Kurd hemû rabe ser piyan û xwedî li îradeya xwe derkeve. Divê bi tu awayî vê rewşê qebûl neke, yekser nerazîbûna xwe nîşan bide û divê heya desthilatdarî bi paşde gav neavêje, îpoteka li ser îradeya neyê rakirin û şaredarî ji gel re neyê dayîn, nesekine.  Yên tên kirin bi qasî ku xesp û qirkirinê di heman demê de binpêkirineke demokrasî û hiqûqê ye. Têkoşîna li hemberî van polîtkayên antîdemokratîk, qirker û talanker egere sereke ya demokrasiyê ye. Banga me ya ji bo gelê me ew e ku bila xwedî li rûmeta xwe, azadiya xwe û îradeya xwe derkeve. Divê gelê me heya ku ev xesp li holê radibe, çalakiyên xwe bidomîne.

Em bang li civaka Tirkiyeyê û hêzên demokrasiyê yên Tirkiyeyê dikin ku bila bi tevahî piştevaniya gelê Kurd bikin. Xwedîderketina îradeya gelê Kurd û daxwazên jiyaneke azad û demokratîk tê wateya xwedîderketina demokratîkbûyîna Tirkiyeyê. Her derbeya ku li îradeya gelê Kurd tê xistin, tê wateya derbeya li dijî demokratîkbûyîna Tirkiyeyê. Desteserkirina şaredariyên Mêrdîn, Êlih û Xelfetiyê jî derbeyek e. Di heman demê de derbeyeke li dijî demokrasiya Tirkiyeyê û pêkvejiyanê ye. Ev darbe di heman demê de li demokrasiya li Tirkiyeyê û îradeya jiyana bi hev re hatiye xistin. Eşkere ye ku desthilatdariya AKP-MHP'ê ya faşîst wê nsekine û hem li Kurdistanê hem jî li Tirkiyeyê desteserkirina îradeya civakê dewam bike. Destpêkê Şaredariya Esenyûrtê, niha jî şaredariyên Mêrdîn, Êlih û Xelfetiyê desteser kir ku ev yek nîşan dide wê dewam bike. Ji ber vê jî divê gel li hemberî faşîzm, talan, desteserkirin û qirkirinê bi hev re li ber xwe bidin û heta ku îradeya hatiye desteserkirin ji nû ve bi dest bixe, çalakiyên xwe dewam bikin."