Meclîsa Jinên Êzidî ya Şengalê bi daxuyaniyeke nivîskî bal kişand ser dewamiya siyaseta qirêj a PDK li hemberî jinên Êzidî dimeşîne û banga hevgirtin û yekîtiyê li hemû jinan kir.
Meclîsa Jinên Êzidî ya Şengalê daxuyaniyeke nivîskî weşand û got, "Di vê dema ku em nêzî salvegera fermana 74'an a li ser ol, dîrok, çand, jin û zarokên Êzîdxanê hatiye kirin dibin de, birînên me wekî jin careke din di van rojan de vedibin. Ji ber bi hezaran jin û zarokên Êzîdxanê hîna di bin rehma hovîtîya DAIŞ'ê de dijîn. Bi taybet berî demekê di destpêke rojiya Remazanê de 19 jin û zarokên Şengalê bi agirê hovitiya DAIŞ'ê li ber çavê hemû mirovatiyê di qefesên hesin de hatin şewitandin. Em vê bêdengiya li hember hovitiyê wekî erêkirinek li hember keç û jinên Şengalê dibînin. Wekî jin divê em ji her demê bêhtir yek bin."
Di daxuyaniyê de bal hat kişandin ser axaftina rêvebereke PDK'ê ya bi navê Çinar Seet ku di 20'ê Hezîranê de li qenaleke televîzyonê kiribû û îdîa kiribû ku ev fermana bi serê Êzidiyan de hat pêşî li jinên Êzidî vekir ku dengê xwe bigihînin cîhanê.
Meclîsê da zanîn, ku vê kesa navborî, di axaftina xwe de mînaka Nadya Mûrat daye û gotiye, "Eger DAIŞ nebûya, kesên weke Nadya Mûrat di nava raya giştî ya cîhanê de nedihat naskirin."
Meclîsê destnîşan kir, ku ew weke Jinên Şengalê û Êzîdxanê van daxuyanî û şîroveyên Çinar Seet rast nabînin û qebûl nakin ku jineke Kurd bibe berdevka siyaseta qirêj a PDK'ê li hemberî jinê dimeşîne.
Daxuyaniya Meclîsê bi vî rengî dewam kir:
"Hevkariya PDK'ê ya bi DAIŞ'ê re, ku ferman li Şengalê rakir, ji aliyê her kesî ve tê zanîn. PDK'ê bi tenê bi hiştina civaka Şengalê re bû sedem ku ewqas jin û zarok bikevin destê DAIŞ'ê. Bû sedem ku DAIŞ di sedsala 21'an de vê hovîtiyê bîne serê jinê.
Em dibêjin, li şûna ku em wek jin hev du reş bikin, divê em hev du bigirin û bi pêş bixin. Ti jin divê xwe neke hevalbendên DAIŞ'ê hevkarên wî.
Weke Meclîsa Jinên Şengalê, ku îradeya jin a rêxistinî temsîl dikin, dixwazin Çinar Seat lêborîna xwe li ser vê nirxandina xwe ya bi zîhniyeta mêr hatiye hûnandin, bi taybet ji Nadya Mûrat û hemû jinên Şengalê bixwaze.
Em bang li hemû rêxistinê jinan ên li Başûrê Kurdistanê dikin ku li hember nêzîkatiyên PDK'ê ku ji bo siyaseta xwe ya qirêj bide meşandin jinan dikin amûr, divê hestiyar bibin.
Jin, ji kîjan hizbî, olî yan jî girêdayê kîjan saziyê be bila bibe dema mijar bû jin û êşên jin û zarokan divê li gor hest û nêrînên jin tevbigere û parastina nirxên jinan bike. Li ser vê esasê divê em wek jin hevgirtin û yekdestiya xwe esas bigirin. Ne ku faşîzma bîrûbaweriya mêr meşrû bikin."
