Ji bo Sakîne Cansiz, Fîdan Dogan û Leyla Şaylemez ên li paytexta Fransa Parîsê hatin qetilkirin, li bajarê Frankfûrt ê Elmanyayê bi daxwaza edaletê çalakî hat lidarxistin.

Endamên Meclîsa Jinê ya Amara ya Frankfûrtê, Meclîsa Jinê ya Nûjîn a Hanû û Kurdistaniyên ji Maînz û Darmstadtê duh li ber Konsolosxaneya Fransayê li hev civiyan.

Di çalakiyê de komkujiya li Pirsûsê jî hat şermezarkirin û şoreşgerên di komkujiyê de hatin qetilkirin hatin bîranîn. Nûnera YJK-E Delal Yaman li vir axivî.

Yaman diyar kir, yên li Parîs û Pirsûsê kirin xwedî heman zîhniyetê ne û taloqkirina rûniştina dozê ji bo demeke ne diyar, şermezar kir. Yaman got, "Em ê dest ji vê dozê bernedin. Em dixwazin rûniştina dozê derhal pêk bê û kiryar werin eşkerekirin.

Çalakî, piştî xwendina belavoka CENÎ qediya.