Armanca sereke ya kampanyayê, ku bi pêşengiya Kongreya Jinên Azad (KJA) ve dest pê kiriye, azadiya Rêberê Gelê Kurd Abdullah Ocalan e. Kampanyayê li gelek bajarên Kurdistan û Tirkiyeyê dest pê kir. Yek ji cihên ku kampanya bi xurtî lê dimeşe, navçeya Gimgim a Mûşê ye.

'EM LI NAVA MALAN DIGERIN Û JINAN BI RÊXISTIN DIKIN'

Jinên KJA'yî yên li navçeya Gimgimê, ku berê li taxan civîn lidar dixistin, vê carê li nava malan digerin, jinan digihînin nasname, cewher û azadiya xwe. Ji aktîvîstên KJA'yê yên li Gimgimê dixebitin Şengul Çîçek da xuyakirin, ku divê jinên Kurd êdî xwe nas bikin, xwedî li axa xwe derkevin û ji ajansa me re qala karên xwe kir.

'GELÊ GIMGIMÊ MÎNA ROJA DESTPÊKÊ XWEDÎ LI AXA XWE DEDIKEVE'

Çîçek diyar kir, yekane mirovê azadiya jinê nas kiriye Ocalan e û destnîşan kir, ku sedema naskirina xwe ya jinan, Ocalan e. Çîçek got, "Xebatên me yên li Gimgimê bênavber dewam dikin û bi koordîneyeke baş dixebitin. Gelê Gimgimê xwedî li Rêberê xwe derdikeve. Gelê me mîna roja destpêkê li ser piyan e û bi serbilindî tevdigere. Em çiqasî xwedî lê derkevin, çiqasî bi rengekî rast karê xwe bimeşînin, wê baweriya gel a bi me û nasnameya xwe zêde bibe. Di çarçoveya vê kampanyayê de em her roj li nava malan digerin û li rewşa jinan dipirsin. Bi rewşa wan a aborî û azadiya şexsî re eleqedar dibin."

'SOHBETÊN ME JI BO JINAN GELEKÎ BAŞ DERBAS DIBIN'

Çîçek ragihand, jinên Gimgimî di asteke xurt de xwedî li Rêberê xwe derdikevin û bi baldarî xwe nêzî kampanya KJA'yê dikin. Çîçek got, "Jinên li vê derê piştgiriyeke mezin didin karê me yê li vir. Em jî hem bi rewşa wan a malbatî hem jî bi pirsgirêkên wan re eleqedar dibin. Ji aliyê giştî ve nêzîkatiya jinê me erênî ye û sohbetên me jî baş derbas dibin. Em bi taybetî hewl didin pirsgirêkên aboriyê yên jinan çareser bikin."

'LAZIM E JIN DAKEVIN QADAN'

Çîçek got, "Divê em xwedî li Rêberê xwe derkevin, ji ber ku wî pêşengî nîşanî me da" û bang li jinên Kurd û hemû jinên cîhanê kir, ku destekê bidin vê kampanya wan. Çîçek da zanîn, divê jin li her cihî, li her qadê rabin ser piyan û destnîşan kir, ku ji bo azadiyê divê bi hev re têbikoşin û dilsozê têkoşînê bin. Çîçek herî dawî got, divê jin ji bo Rêberê xwe û azadiya xwe, li qadan bin.