Bi munasibeta 9’mîn salvegera rizgarkirina Şengalê malbatên Şehîdan ji ANF re axivîn. Dayîka Şehîd Bawer Pakîza Celal got, "Her gava em nêzî salvegera rizgarkirina Şengalê dibin dewleta Tirk êrişî Şengalê dike û dixwaze wê kêfxweşiya me ji me re bike reşî. Di sala 2023’an jî û di heman rojê de dewleta Tirk êrişî Şengalê kir û 2 zarokên me yên YBŞ’ê Şehîd xistin. Îsal jî bi heman awayî careke din êrîş kir û ciwanê bi navê Kerîm Hecî Şehîd bû. Ev kiryarên dewleta Tirk tev ji ber ku da gelê me li ser cih û warê xwe venegere."

'NEMA GELÊ ME JI GEF Û ÊRÎŞAN DITIRSE'

Pakîza Celal destnîşan kir ku gelê wan nema ji gef û êrîşan ditirse û got, "Raste em bi rizgarkirina Şengalê û salvegera wê ya 9’mîn gelek kêfxweş in lê di heman demê de bi êş in jî. Kêfxweşiya wê ew e ku niha bi 100 hezaran kes ji gelê me li ser axa Şengalê dijî û li gel êrişan jî vegera gel berdewame. Ya bi êş jî ew e ku di nava salekê de me gelek şehîd dan û beriya salvegerê bi 2 rojan careke din jî me dan. Ji xwe dijmin karê xwe dike û em jî karê xwe dikin. Sekna gelê me ya berxwedêr bersiva her êrîşê ye."

Pakîze Celal got, "Di dema rizgarkirina Şengalê de careke din PDK’ê bi derewan xwest gelê me bixapîne û wek ku wê Şengal rizgar kiribe xwe bide nîşan dan. Lê her kes jî dizane ku cihê PDK’ê û Pêşmeregeyên wê yek fîşek jî neteqand, lê cihê şervanên azadiyê û zarokên Êzdiyan tê de bûn şerê pir dijwar rû dide û gelek şehîd jî hatine dan. Şehîdgeha em niha tê de ne wê rastiyê radixe ber çavan. Gelek caran PDK dibêje me Şehîd li ber axa Şengalê de dane. Em ji wan pirs dikin gelo şehîdekî bê kur heye yan jî bê dayîk û bav heye, ka bila yek ji dayîk û bavê wan şehîdên ku PDK’ê behs dike derkeve bibêje zarokên me li ber axa Şengalê şehîd ketiye. Bila gelê me bes were xapandin bi destê PDK’ê. Ji derewên wan bes bawer bikin. Rastiya heyî li ser axa Şengalê ye. Vegerin ser axa xwe û li axa xwe xwedî derkevin."

Dayîka Şehîd Bawer Pakîza Celal bang li dayîkan kir û got, "Ji zarokên xwe fam bikin, gava diavêjin bila di bin kontrola we de bin. Dijmin dixwaze zarokên me bike sîxurên xwe û destê wan bixe nava xwîna civakê. Dijmin bi xwe nikare bê sîxurtî tu karî li ser civaka me û zarokên bike û wan bike hedef. Em jî zarokên xwe kontrol bikin û nehêlin ku bikevin xefikên dijmin. Dijmin dixwaza civakê bi hev bide kuştin û belavbûnê di nava civakê de çêbike. Em jî vê rêyê nedin wan, bi dilê xwe bin."

Pakîze Celal herî dawî salvegera rizgarkirina Şengalê li gerîlayên azadiyê û Rêber Apo pîroz kir û sersaxî ji tevahiya malbatên gerîla û şervanên ku li ber rizgarkirina Şengalê şehîd ketine xwest.

'DI DÎROKA ÊZIDIYAN DE CARA YEKEM E DIBIN XWEDÎ HÊZ Û ÎRADE'

Bavê Şehîd Mensûr Apocî Hemed Bişar jî salvegera Rizgarkirina Şengalê di şexsî Şehîd Kerîm Hecî de li tevahiya malbatên şehîdan pîroz kir û got "Îro 9 sal li ser rizgarkirina Şengalê re derbas bûn. Em derbasî sala 10’mîn bûn. Ev cara yekem e ku gelê me wisa li ser axa xwe vedigere, li gel ku rastî fermaneke ne ji rêzê hat. Di nava 73 fermanên derbasbûyî de li ku ferman rabû be kesek careke din li wir venegeriya ye. Lê li Şengalê rabû ne gel bi temamî axa xwe terk kir û bi 100 hezaran jî îro li ser axa Şengalê dimînin. Ev yek kêfxweşiyeke herî mezin e ku îro em dibînin û ji xwe vê yekê xewin û xuyalên dijmin têk birin, hesabê wan ê malê û sûkê li hev derneket."

'CIVAKA ÊZIDÎ DI HER WARÎ DE XWE BI RÊ VE DIBE'

Hemed Bişar got, "Şengal ji kavilekî ber bi xweseriyekê gavên dîrokî avêtin. Eger em 9 salan li bîra xwe re bînin ferq û cudahiya wê pir heye. Em di destpêkê de bêrêxistin bûn. Niha li tevahiya gund û bajaran hêzên me yên Asayîşê hene û parastin û ewlehiya şêniyan dikin. Bi hezaran hêzên me yên YBŞ’ê, YJŞ hene û di warê siyasî civakî de jî me rêxistina xwe xurt kir û em xwe bi rêve dibin. Ev gavên dîrokî ne hatine avêtin û yek cara berê ye di dîroak Êzdiyan te tiştek wiha çêdibe. Di dema fermanê de em li tevahiya cîhanê ber belav bûn, lê bi rizgarkirina Şengalê re careke din gel berê xwe da Şengalê û li ser axa xwe vegeriya. Ev yek jî bi saya hêzên me yên leşkerî û rêxistina me ye."

Bişar herî dawî bang li civaka Êzidî kir, ku vegere li ser axa xwe û got, "Em îro dinerin, cîhan ber bi şerekî mezin ve gavan diavêje. Ji cîhanê wirdetir Başûrê Kurdistanê di xeteriyek mezin de ye. Heya niha gelek ji civaka me li wir jiyan dikin. Eger rojek beriya ya din werin baştire. Bila gelê me nefikire ku hîna em ji fermanan xilas bûne, em xilas nebûne û ferman dewam dike. Êrişên îro yên dewleta Tirk li ser Şengalê dewamiya fermanê ye û tola DAÎŞ'ê hilanîne. Bila gelê me hîn bêhtir şiyar be."