2. Konferansa Jinên Ciwanên Azad bi şiyara "Bi agirê berxwedanê re em ê azadiya serokatî misoger bikin" li bajarê Elmanya Dusseldorfê hat lidarxistin. Salona konferansê bi rengên kesk, sor, zer û mor hat xemilandin. Jinên ciwan bi kincên gelêrî beşdarî konferansê bûn. Di konferansa ku bi beşdariya 100 delegeyan destpê kir de dirûşmên "Jin jiyan azadî" û "Bijî Serok Apo" hatin qîrîn. Jinên Ciwan ên beşdarî konferansê bûn li ser mijarên "Li Ewropayê pirsgirêkên jinên ciwan", "Li Ewropayê hişmendiya zayendî" û "jinên ciwan ên şoreşger azad" nirxandin kirin.

Piştî deqeyeke rêzgirtinê, Bermal Botan axaftina vekirinê ya Konferansê kir û got, "Pêvajoya heyî ya li Kurdistanê pêvajoyeke dîrokî ye. Lewma ev konferansa em pêk tînin xwedî mîsyoneke girîng e."

Botan bal kişand ser rola girîng a berxwedêrên YPS Jin li Bakurê Kurdistanê û got, "Berxwedan û serketinên li Rojava, Şengal û tevahiya Kurdistanê divê li Ewropayê jî bi pêşengiya jinên ciwan pêk werin."

Botan destnîşan kir, ji bo azadiya Rêberê Gelê Kurd Abdullah Ocalan divê têkoşîn derhal were xurtkirin û got, "Dem dema azadiya Rêber Apo, dema berxwedan, dema Jinên Ciwanên Azad e."

Piştre jinên ciwan li ser pirsgirêkên li Ewropayê axivîn û işaret bi girîngiya rêxistinbûyîna jinên ciwan kirin. Di konferansê de rapora karê salekê hat xwendin û nirxandin. Piştî xwendin û erêkirina rêziknameya Jinên Ciwanên Azad rêveberiyek ji 16 kesan hat hilbijartin.

Konferans piştî axaftina girtinê bi gerandina govendê bi dawî bû.