Meclîsên Jinan ên Hollandayê daxuyaniyeke nivîskî weşandin û bibîr xist, ku di nava herikîna dîrokê de 73 ferman civaka qedîm a Mezopotamyayê li Êzidiyan rabûne.

Di daxuyaniyê de hat ragihandin, herî dawî Tebaxa sala 2014'an, AKP a faşîst û barbariya DAIŞ'ê êrîşî Êzidiyan kirin û hat gotin, di van êrîşan de bi hezaran Êzidî hatin kuştin, bi hezaran jin û zarok hatin revandin û hê jî di destê çeteyên barbar ên DAIŞ'ê de ne.

Meclîsên Jinan diyar kirin, tevî ku 3 sal di ser fermanê re derbas bûne jî xeterî û gefên li ser gelê Şengalê neqediyan e, dewam dikin û gotin, "Sedema vekirî ya vê yekê jî dijminatiya li Kurdan a li Rojhilata Navîn e. Civaka Êzidî, li ser rêya ji nû ve avakirina jiyanê, bi rêxistinbûneke xurt a xweparastinê dikare bi ser bikeve.

Mirovahî wê qirkirina faşîst a li Şengalê hate kirin ti carî efû neke. Em bang li jin û dostên xwe yên li Hollandayê dijîn dikin, ku xwedî li Şengal û Rojava derkevin."

Çalakiya ji bo şermezarkirina fermana Şengalê, wê li ber avahiya şaredariya Den Haagê saet di 11:00 de dest pê bike.