Hevseroka KCD'ê Selma Irmak di Civîna Giştî ya Komîsyona Jinê ya KCD'êde axivî û nirxandina "AKP'ê biryara şer daye lê em ji biryara aştiyê venagerin" kir.

Endamên Komîsyona Jinê ya Kongreya Civaka Azad ji bo Civîna Giştî li Amedê kom bûn. Hevseroka KCD'ê Selma Irmak, Endama Diwana Serokatiyê ya KCD'ê Mulkiye Bîrtane û endamên desteyê beşdarî civînê bûn. Civînê bi rêzgirtinê destpê kir û bi axaftina Mulkiye Bîrtane berdewam kir.

Bîrtane di axaftina xwe de diyar kir ku piştî êrîşên ku li pey hilbijartinên 7'ê Hezîranê hatin kirin nekarîne xebatên xwe bimeşînin û AKP'ê bi lîstikên qirêj di hilbijartinên 1'ê Mijdarê de ji sedî 49 deng girtiye. Bîrtane bal kişand li ser êrîşên li Cizîr, Licê, Silopiya û Kurdistanê û got ku bi taybetî jî ev êrîş li ser jinan hatiye meşandin. Bîrtane nirxandina "Weke jin divê van pêkûtî û zordestiyan pûç bikin" kir.

Piştre Hevseroka KCD'ê Selma Irmak axivî û mizgîniya azadkirina Şengalê da jinan û got ku li hemberî vê têkoşînê ti hêz nikare bisekine.

Irmak piştre destnîşan kir ku yên li Cizîrê nekarin bigihîjin armanca xwe li Farqînê jî nikarin bigihîjin armanca xwe ji bo vê yekê jî weke jin divê têkoşîneke xurtir bidin.

Irmak bilêv kir ku ew ê weke jin di civînê de di pêvajoya saleke de çi bikin nîqaş bikin û wiha axivî: "AKP'ê biryara şer daye lê em dest ji biryara aştiyê bernadin. Heta ku tecrîda li hemberî Birêz Abdullah Ocalan neyê rakirin ev ê bi vî rengî berdewam bike. Ji bo me biryara serokatiyê ne pirsgirêk e. Serokatî divê cudatiyên ol, nijad û çandê nas bike û guhê xwe bide gotinên gel."

Piştî axaftinan civînê ji çapemeniyê re girtî berdewam kir.