Girtiyên jin ên li Girtîgeha Jinê ya Evîn a li Tehranê ku bi êşkenceyê navdar e, ragihandin ku wê bi greva birçîbûnê piştgiriyê bidin greva giştî ku di salvegera duyemîn a serhildana 'Jin, Jiyan, Azadî' de hatiye ragihandin.
Li gorî ajansa JINHA’yê girtiyên jin ên li girtîgeha jinan a Evînê doh bi şev bi wesîleya duyemîn salvegera serhildana ‘Jin Jiyan Azadî’ ku bi qetilkirina Jîna Emînî dest pê kir, li hewşa girtîgehê kom bûn û çalakî lidar xistin. Di çalakiyê de girtiyan hîcabên xwe ji serê xwe derxistin şewitandin û dirûşm berz kirin.
Çalakî li ser hesabê medyaya dîjîtal a xwediya xelata Nobela Aştiyê ya 2023’an Nergîs Muhammedî ve hat parvekirin û wiha gotin: “Îşev bi boneya duyemîn salvegera serhildana ‘Jin Jiyan Azadî’ ku bi qetilkirina Jîna Emînî destpê kir, zêdeyî 25 girtiyên siyasî yên jin li hewşa girtîgeha Evînê kom bûn, li ser kartonan dirûşm nivîsandin û bi dîwarên girtîgehê ve daliqandin. Di korîdor û hewşa girtîgehê de dirûşmên ‘Jin Jiyan Azadî’ berz kirin. Navê kesên ku hatine qetilkirin û darvekirin xwendin. Girtiyên jin bi armanca şermezarkirina polîtîkayên tepisandina jinan ji bo ferzkirina hîcabê şermezar bikin, hîcabên xwe ji serê xwe derxistin li hewşa girtîgehê şewitandin. Jinên berxwedêr diyar kirin ku ew ê roja Yekşemê ji bo piştgiriya greva birçîbûnê bi gelê Îranê re dest bi greva birçîbûnê bikin.”
