Yek ji damerîznera PKK’ê û pêşenga Tevgera Azadiya Kurd Sakîne Cansiz, Fîdan Dogan û Leyla Şaylemez di 9’ê Çileya 2013’an de ji aliyê dewleta Tirk a dagirker ve li Parisê hatin şehîdxistin. Endama Fermandariya Konseya Leşkerî ya YJA Starê Ferîde Alkan bi boneya 12’emîn salvegera Komkujiya Parisê ji ANF’ê re axivî. Ferîde Alkan di axaftina xwe de qala tekoşîna Sakîne Cansiz a ji bo azadiya gelê Kurd û bi taybet ji bo azadiya jinan kir û got: “Beriya 12 salan li paytexta Fransa Parisê ya ku weke paytexta demokrasiya cîhanê tê nasîn, yek ji damezrînera partiya me PKK’ê, yekem jina Kurd a tekoşîna azadiyê, pêşeng û xwedawenda me ya azadiyê rêheval Sara (Sakîne Cansiz), pêre milîtana hêja ya PKK û PAJK’ê rêheval Rojbîn bi salan li qada Ewropayê xebatên dîplomasî meşand, bû zimanê gelê Kurd, da ku pirsgirêka Kurd bigihîne cîhanê sekneke profesyonel a milîtanî raber kir. Her wiha jina ciwan, endama tevgera azadiya jinê, di heman demê de, endama rêxistina komelên ciwan rêheval Ronahî di buroya enfermasyona Kurd a Parisê de bi komployekê hatin qetilkirin. Wê rojê di serî de weke hevalên wan ê Tevgera Azadiyê, hemû dostên me û tevgerên demokrat ên cîhanê weke komploya navneteweyî ya duyemîn hejandinek çêkir.

TÊKOŞÎNA HEVAL SARA BÛ NASNAMEYEK Û BÛ RUHEK

Tekoşîna Azadiya Kurdistanê, di pêşengtiya azadiya jin de, di şexsê hevrê Sara de sembolîze bû. Felsefeya Rêber Apo, pêşengtiya jin a di nava vê felsefê de di şexsê heval Sara de dihate nasîn. Yekem jina Kurd a tevlî nava şoreşê bû. Ji Dersimê berê xwe dabû Enqereyê, tevlî koma Apociyan bû û di pêvajoya destpêkê de jî pir çalak kar dabû maşandin. Di heman demê de di kongreya damezrandina PKK’ê de cihê xwe girtibû. Hevrê Sara di sala 1979’an de hat girtin. Wê di hovîtiya zindana Amedê de, îradeya gelê Kurd temsîl kir, bi berxwedaniya xwe pergala dagirker û qirker têk bir. Di êşkenceyên herî giran de serî netewand, çog nedanî, tif kire nava rûyê celadê bi navê Esat Yildiran. Hem teslîmiyet qebûl nekir, hem jî nehişt ku yek jin di qawişa ku ew têde bû bê hêvî bibe. Li ser hevalên jin êşkenceya herî giran dihate kirin, bedena wan li hemberî wan dihate bi karanîn, ruxmê vê herdem serhildayî ma. Lewra ew di zindana Amedê de jî, ji bo hemû kadroyên PKK û sempatîzanê wê bû çavkaniya moralê û hemû hevalan jê hêz girtin. Berxwedana wê berxwedan mezin kir. Ne ji ber ku hevrê Sara şehîd e ev tişt tên gotin, hîn şehîd nebûbû jî dema qala berxwedana zindana Amedê tê kirin sekna şehîd Sara tê gotin. Di şexsê sekna wê de vîna jina Kurd a li hemberî dagirkeriyê xurtir bû. Heval Sara yekem hevala ku hîn dijiya Rêber Apo wêneya wê bi odeya xwe ve daliqandiye, pîroziya ku ji bo şehîdekê were kirin ji bo wê hate kirin. Lewra jiyan û têkoşîna heval Sara di nava me de bû nasname, bû ruhek. Li ser berxwedana wê jinan ref bi ref tevlî Tevgera Azadiyê dibûn.”

JIYANA ŞOREŞGERÎ Û MILÎTANÎ BINGEHA FELSEFEYA WÊ BÛ

Ferîde Alkan anî ziman ku hevrê Sara ji qadên gerîla heta Mexmûr û Ewropayê pêşengiya xebatan kir û wiha domand: “Hevrê Sara bû rêgeh û rênîşana gel û jinan. Heya roja ku gihişte şehadetê wê her wisa bêhempa tekoşîn kir. Herdem ew bû pêşenga jina azad, bû yekem jina Kurd ku tevlî koma destpêkê bû û bû yekem kadroya jin ku tevlî Yekemîn Kongra PKK’ê bû. Ew bû yekem pêşenga jin ku di zindana Amedê de di rûyê zilimkaran de sekinî. Piştî ji zindanê derket xwe gihand avabûna artêşa jin. Heval Sara bi keda xwe bingeha artêşa jinê ava kir. Lewra di hemû gavên têkoşîna jinan de, wê  her pêşî vekiriye û  bingeh daniye. Xebatekî me yê ku keda heval Sara têde tinebe, nîne. Li qadên Rojava, Mexmûr, Ewropa li her dera ku ew maye li ser navê têkoşîna jin gavên dîrokî yên mezin avêt. Li wargeha Mexmûr îro li ser bingeha ku heval Sara bi keda xwe avêtiye, sîstema perwerdeya bi sedan ciwanan tê sazkirin. Di qadên çiya de, ji Botanê heya Heremên Parastinê yên Medyayê cihekî ku keda Sara lê nedabe tineye.”

HEVAL SARA EVÎNDARA WELATÊ XWE Û HEVALÊN XWE BÛ

Ferîde Alkan bi bîr xist ku di salên dawî de ji bo meşandina xebatên dîplomasî derbasî qadên Ewropayê bû û wiha pêde çû: “Di dîwana KONGRA GEL de cihê xwe digirt, di heman demê de endama Loordinasyona Meclîsa PAJK’ê bû. Heval Sara evîndara welatê xwe bû, evîndara hevalên xwe bû. Jiyana şoreşgerî, jiyana milîtanî ji bo wê felsefa bingehîn bû. Bi taybet ji bo ku nifşên nû li ser felsefe û çanda PKK’ê teşe bigirin, her di nava hewldaneke mezin de bû. Li girekî tenê du heval jî hebana heval Sara girîng didît ku biçe wan hevalan bi xwe bibîne û bi wan re mijûl bibe. Ne tenê bi hevalan re bi malbatên gelê me yê Başûr re kî dîtiban diçû gel wan, bi wan re civîn çêdikir, çavên wan li rastiyan vedikir û ked di ber wan de dida. Her kes gelekî jê bi bandor dibûn. Lewra ti kes nedikarî tempoya heval Sara derbas bike. Armanca wê ew bû ku her heval di xeta milîtanî de, di xeta Rêber Apo de xwe çêbike. Di vî alî de gelekî bi îsrar bû. Hemû xebatên xwe jî bi heyecaneke mezin dikir.”

EV KOMPLO YEK JI PLANA ŞERÊ TAYBET A DEWLETA TIRK BÛ

Ferîde Alkan, wiha domand: “Sekna têkoşer a heval Sara hîn ji malê destpê kiribû. Bi qasî şerkeriya xwe, ewqasî jî dilnizim bû. Ruxmê ku ji bo me sembola gelek pêvajoyan bû, lê ti carî wê şexsê xwe bi salên xwe yan jî bi berxwedana xwe  dernedixiste pêş. Wê weke Sakîne Cansiz hebûna xwe çêkiribû. Tenê dema wê dîtibana ku êrîşek li ser partiyê heye, wê demê heval Sara bi her tiştê xwe ve derdiket pêş. Di parêzvaniya wê de, ji her hêlê de dihate fêmkirin ku ew damezrînera PKK’ê ye.

Ev komkujî planeke îstixbarata Tikriyê bû. Eşkere bû ku Wezîrê Karên Derve yê Tirkiyeyê Hakan Fîdan ku wê demê musteşarê MÎT’ê bû sazvanê vê komployê ye û bi erê kirina Erdogan re hatiye kirin. Rêber Apo got, ‘Ev êrîşa li hemberî Sakîne Cansiz pêk hat, êrîşa li hemberî têkoşîna azadiya jinê ye’. Di wê pêvajoyê de dewleta Tirk qaşo bi me re li ser masê bi rêya diyalogê daxwaza çareseriyê dikir. Hevdîtin dihatin kirin û di wê demê de komkujiya Parisê hat pêşxistin. Ev jî careke din kûrbûna planên dewleta Tirk ên şerê taybet radixe ber çavan. Ji aliyekî de qala wekheviyê dikirin, ji aliyekê de jî li hemberî me di nava planên bi vî rengî de bûn. Lewra rastiya dewleta Tirk a komploger ev e.

 Heval Rojbîn jî li qada Ewropayê bû, pir çalak bû û nasnameyeke wê ya rewa hebû. Nûnereke gelê Kurd bû, doza Kurd bi cîhanê dida nasîn û rewa dikir. Lewra ji bo dewleta Tirk jiholêrakirina wê girîng bû. Her wiha heval Ronahî keça malbateke welatparêz, di xebatên ciwanan de çalak bû. Îstixbarata Tirk li ser lihevkirina NATO’yê planeke wiha kirêt li ser van sê şoreşgerên mezin pêk anî. Gele Kurd û dostên wan bertekek mezin nîşanî komkujiyê dan. Bi sed hezaran kes daketin qadan. Heval Sara dihate nasîn, lê bi şehadeta wê re her kes matmayî bû. Meraq kirin ev jin kî ye ewqas dilsozên wê hene. Pêl bi pêl mirov daketin kolanên Parisê. Gel bi hêrseke mezin li Parisê kom bû. Ev berteka gelê me, meraqa cîhanê li hemberî van hersê jinên şoreşger û tevgera azadiyê zêde kir.

BI XWEDÎDEKERTINA GEL ARMANCA KUJERAN VALA DERKET

Dijmin xwest me lawaz bike, lê bi xwedî derketina gelê me têkoşîna heval Sara bi cîhanê dane naskirin. Bi dehan rêxistin, femînistan, ciwan û ekolojîstan di cîhanê de heval Sara weke pêşenga tevgera xwe bi nav kirin. Armancê kujeran vala hate derxistin. Berovajî, di şexsê van hersê jinên leheng de doza me li hemû cîhanê baştirîn hate nasîn. Rêber Apo şehadeta heval Sara weke komkujiya duyemîn a Dersimê pênase kir. Dema li Dersimê komkujî çêbû kes nebû xwedî li wan derkeve. Kurdistan di rewşeke cûda de bû, êşa gel bi wan re ma. Qirkeran komkujî di tariyê de hiştin û bertek tepisandin. Bi PKK’ê re hişyarî û têkoşîna ji bo tolhilanîna Dersimê çêbû. Lewra di komkujiya duyemîn de, di şexsê heval Sara de berovajî wê demê, hemû gelê me û dostên xwe rabûn ser piyan. Ev jî encama têkoşîna Rêber Apo û heval Sara ye.”

‘EM HEMÛ ŞAGIRTÊN HEVAL SARA NE’

Ferîde Alkan anî ziman ku bertekên gel û xwedîderketina wan tirs di dilê komplogeran de çêkir û wiha got: “Dîtin ku bê çiqasî dilsozên PKK’ê hene. Heman ruh li qadên Bakur jî derket holê. Ev hemû jî nîşaneyên girîng in ku Kurd ne Kurdê berê ne, bi saya Rêber Apo û PKK’ê yekîtiyeke me ya pir xurt çêbûye. Xwedîderketina li nirxên xwe asta herî jor de ye. Lewra ti caran kujer nikarin bigihêjin hedefên xwe. Em di mirinê de mezin dibin, kes bi kuştinê nikare me lawaz bike. Divê were zanîn ku li Kurdistanê ew serdem derbas bûye. Xwedîderketina gelê me ev peyam da neyaran; em hemû şagirtên heval Sara ne. Em bi pêşengtiya Rêber Apo, bi berxwedana heval Sara bandor bûn û tevlîbûn.

DI DIL û MEJIYÊ GELÊ ME DE KUJER ZELAL IN

Di Kanûna sala 2022’yan de heman plan li hemberî hevrê Evîn Goyî, hunermend Mîr Perwer û welatparêz Abdurrahman Kizil hatin hedef girtin. Dewleta Tirk heman plan pêk anî. Tenê nasnameya kujer guhertin. Vê komkujiyê bi destê kesekî Fransî ku demekê di zindanê de mabû, dan kirin. Dîsa gelê me rabû piyan û bertek nîşan da. Hesabê kujerên wisa bi tekoşînê tê pirsîn. Di dil û mejiyê Tevgera Azadiyê û gelê me de kujer zelal in û em zanin bê kî ne. Bi dijwarkirin û radîkalkirina têkoşînê re em ê hesabê komkujiyan bipirsin.”