Meclîsa Dayikên Aştiyê destek da akademîsyenên li dijî komkujiyên li Kurdistanê danezana bi serenavê "Em ê nebin şirîkê vî sûcî" weşandin. Dayikên Aştiyê li avahiya meclîsê ya li Amedê daxuyaniyek dan û gotin, "Mirovên bi şeref û namûs, alîgirê aştiyê ne."

Endama Meclîsa Dayikên Aştiyê Havva Kiran daxuyanî da û got, "Li vî welatî, li dijî şerxwazên dixwazin bi xwînê banyo bikin, bilêvkirin û xwestina aştiyê ne karê her kesî ye." Kiran diyar kir ku ew li cem akademîsyenên daxwaza aştiyê kirine cih digirin û got, "Li Cizîr, Silopiya û Sûrê xwîn dirije. Me gelek caran bang li dayikên leşkeran kirin û gotin, 'Werin em vê xwîna dirije bi hev re bisekinînin'. Dayik gelekî baş bi zor û zehmetiyên mezinkirina zarokekî dizanin. Me zarokên xwe ji bo bibin qurbanê qesra Erdogan mezin nekir. Zarokên me dimirin, êdî bes e. Bila dayikên leşkeran jî dengê xwe bilind bikin û nehêlin zarokên wan di şerê ji bo xatirê qesrê bimirin. Weke dayikên aştiyê em alîgirê wan akademîsyenên bi şeref û namûs in. Em, binçavkirina akademîsyenan şermezar dikin. Em li cem wan akademîsyenên alîgirê aştiyê ne. Wan hestên me bilêv kirin."