Bi tevkariya Kurdîsh Progress, Serokê Parlamenta Îngilistanê Lîndsay Hoyle malovanî ji resepsiyona Newrozê re kir. Resepsiyon li States Roomê pêk hat.

Nûnerên KNK, Meclîsa Gelê Kurd, Rêxistinên Elewiyan, tevger û rêxistinên Kurdistanî, parlamenterên Îngiliz, gelek lord û kesayet tevlî resepsiyonê bûn.

Lîndsay Hoyle kêfxweşiya xwe anî ziman, ji ber ku malovaniyê ji resepsiyonê re dike û diyar kir ku haya wî ji zor û zehmetiyên li pêşiya gelê Kurd heye.

TÊ WATEYA QEBÛLKIRINA NASNAMEYA KURD

Hoyle anî ziman ku Kurd li welatê xwe zor, zehmetiyan dibîne, qedexe li wan tê ferzkirin û destnîşan kir ku lidarxistina resepsiyonê li salona meclîsê tê wateya qebûlkirina çand û nasnameya Kurdan.

Qisekerên din jî piştgirî dan gelê Kurd û diyar kirin ku ew bi têkoşîna Kurdan a li Tirkiye, Sûriye û Îranê re ne.

Siyasetmedarê Kurd Osman Baydemîr li ser pirsgirêkên civaka Kurd ên li Îngilistanê pêşkêşî kir.

Nûnerê Hikumeta Herêma Kurdistanê Karwan Cemîl Tahîr jî spasiya amadekarên resepsiyonê kir.