Meclîsa Gelê Kurd û Tevgera Ciwanên Şoreşger (TCŞ) a Îngilistanê bi wesîleya salvegera 8’emîn a rizgarkirina Kobanê li avahiya KCC’ê merasîmek lidar xist.

Posterên Rêberê Gelê Kurd Abdullah Ocalan, alên YPG û YPJ’ê û wêneyên şervanên YPG’ê yên ku ji Îngilistanê çûn Rojava û şehîd bûn, li salonê hatin daliqandin. Bê navber dirûşmeyên “Şehîd namirin”, “Bijî Serok Apo” û “Jin jiyan azadî” hatin berzkirin. Di merasîmê de li ser navê TCŞ’ê axaftina vekirinê hate kirin û hate gotin ku qehremantî û fedakariya li Kobanê, îro li çiyayên Kurdistanê, li Zapê bi hemû heybeta xwe li dijî faşîzm û dagirkeriyê didome.

Piştre li ser navê Meclîsa Gelê Kurd Aso Kerîmî û Ercan Akbal axivîn.

Di axaftinan de Arîn Mîrkan hate bîranîn û hat gotin ku gelê Kurd li Kobanê li dijî hovîtiyê têkoşîneke mirovî meşand. Hat destnîşankirin ku têkoşîna li dijî DAÎŞ’ê hatî kirin, li dijî faşîzma Erdogan û dewleta Tirk û hemû paşverûtiyê hate kirin.

Hat diyarkirin ku jinên Kurd di rizgarkirina Kobanê de pêşengiyeke dîrokî kirin û ev pêşengî li hemû cîhanê ji têkoşîna azadiyê ya jinan re bûye çavkaniya îlhamê.

Piştî axaftinan Mîr Serhed û Merwan Şan derketin ser dikê.