Li Qada Sternschanze ya bajarê Hamburg ê Elmanyayê, 10’emîn salvegera rizgarkirina Kobanê bi coş hat pîrozkirin. Pîrozbahî li ser banga Navenda Civaka Demokratîk a Kurd a Hamburgê, Meclîsa Jinê ya Roza û Die Linke Hamburgê hat lidarxistin.

Pîrozbahî bi rêzgirtina ji bo giyanê şehîdan dest pê kir. Di pîrozbahiyê de ewilî Wekîlê Meclîsa Altona ya Die Linke yê Altona û bernamzetê Meclîsa Eyaleta Hamburgê Yavûz Fersoglu axivî û got: “Berxwedana Kobanê sembola azadî û azweriya jiyanê ya Kurdan e. Berxwedana Kobanê li hemberî hêzên tarî rûmeta mirovahiyê û azadî parast. Piştî berxwedana 134 rojan şervanên YPG û YPJ’ê Kobanê ji çeteyên DAÎŞ’ê rizgar kir. Em hemû şehîdên berxwedana Kobanê bi minet û rêzdarî bi bîr tînin.”

Fersoglu, êrîşên dewleta Tirk a dagirker ên li ser Bendava Tişrînê jî şermezar kir û got: “Divê demildest êrîşîn li ser Bendava Tişrînê bên rawestandin.” Fersoglu axaftina xwe bi dirûşmeyên “Biji berxwedana Kobanê” û “Bijî berxwedana Rojava” bi dawî kir.

‘BERXWEDANÊ DÎROK GUHERAND’

Serokê Die Linke Hamburg yê navçeya Altona Malerie Kleinert jî axivî û got: “Berxwedan û serkeftina Kobanê ne tenê ji bo Kurdan ji bo tevahiya cîhanê bû hêvî. Kobanê di 26’ê Çileya 2015’an de bi berxwedan û wêrekiya Kurdan azad bû. Berxwedan timî dîrokê diguherîne.”

Malerie Kleinert xwest Rêber Apo û hemû girtiyên siyasî azad bibin û got: “10 sal berê jinan, gelan û berxwedanê Kobanê rizgar kir. Em ê piştevaniya xwe ya bi Kurdan re bidomînin.”

Pîrozbahî bi dirûşmeyên “Biji berxwedana Kobanê” û “Jin, Jiyan, Azadî” bi dawî bû.