Daxuyanî li avahiya Mala Kurda ya herêmê pêk hat. Endamê Rêveberiya Saziya Zagros Feyzoyê Hisên axivî û komploya li ser Rêber Apo şermezar kir.

Hisên wiha axaftina xwe dewam kir. “Em wek Kurd çarenûsa xwe û azadiya xwe di berxwedana Rêber Apo de dibînin. Heta ku Rêber Apo azad nebe Kurd jî azad nabin, ji ber ku Rêber Apo pirsgirêka Kurd bi şer û têkoşîn gihande asta cîhanê û bi mirovahiyê da hisandin ku em wek gelê Kurd xwedî maf û azadî ne. Ji ber wê jî 24 dewletên mezin ku bi komployeke nemerdane û bêwijdanî Rêber Apo girtin û teslîmê dewleta Tirk ya dagirker kirin. Di vê serdemê de gelê Kurd bi berxwedanî û hêza şervanên xwe û bi pêşengtiya jin û ciwanên ku hêza xwe ji Rêber Apo digrin, wê bi ser bikeve."

Her wiha Hisên bal kişand ser berxwedana ku li Rojavayê Kurdistanê dimeşe û got: “Ev nezî du meh in li  Bendava Tişrînê ya ku bi navê xwe yê nû Bendava Şehîdan e, êrîşên nemirovane tên kirin. Gelê me di nava berxwedanê de ne û şehîdan didin. Em berxwedana wan pîroz dikin."

Hisên wiha axaftina xwe bi dawî kir. “Em wek gelê Kurd bi bawerî û dilsoziya xwe a bi Rêber Apo re girêdayî ne. Dijmin çiqas êrişan bike jî nikarê vîna gelê Kurd tune bike. Em wek gelê Kurd ên Rûsyayê, di wê baweriyê de ne ku fikir û felsefeya Rêber Apo wê bibe çareseriya pirsgirêka Rojhilata Navîn û hemû gelên bindest. ji bo azadiya fizîkî ya Rêber Apo çi ji destê me bê em ê bikin û em bi hêvî ne ev sal bibe sala azadiyê. Dîsa jî em wan dewletên komploger şermezar dikin."

Daxuyanî bi dirûşmeyên “Bijî Rêber Apo” û “bê Serok jiyan nabe” bi dawî bû.