Greva birçîbûnê ya li Strasboûrgê ya Fransayê ya bi mebesta rakirina tecrîda li ser Rêberê Gelê Kurd Abdullah Ocalan, li ber PE'yê di roja sêyan de didome. Roja sêyan a çalakiyê bi organîzasyona Jinên Ciwan ên Azad û Ciwanên Şoreşger dibe. Bi çalakiyekê bêdengiya Parlamenta Ewropayê hate protesto kirin.

Di çalakiyê de navê Zulkuf Gezen, Zehra Saglam, Ayten Beçet û Medya Çinar ên li zindanan li dijî tecrîdê çalakiya fedayî kirin û Ûgûr Şakar ê li Ewropayê li dijî tecrîdê agir berdabû bedana xwe, hate qîr kirin. Piştî çalakiyê ji bo nirxandina pêvajoyê li pêşiya PE’yê panelek hate lidarxistin.

Hevparên SKB’ê ku 3 roj in serdana saziyên Ewropa û parlamentoyê dikin û balê dikêşin li ser grevên birçîbûnê, îro jî serdana çalakgerên Strasboûrgê kirin. Di serdanê de gaziyê ji Komkujiya Pirsûsê jî cih digirt.

‘EM Ê DENGÊ BERXWEDANÊ BILIND BIKIN’

Li ser navê SKB’ê Koordînasyona Ewropayê Esra Asya Guden axivî û got; “Em ji bo dengê berxwedanê ya bi pêşengiya Leyla Guvenê bilind bikin li pêşiya PE di çalakiyê de ne. Em jin em ê berxwedana li dijî vê tecrîda dij mirovahiyê geştir bikin. Hûn ji bo bibin dengê vê qîrinê li virin û em dizanin ku bêdengî mirine. Îro li Lahrê wê Baran Serhat were bibîranîn û em we vedixwînin biranînê.”

‘DIXWAZIN ŞOREŞA YEKBÛYÎ ASTENG BIKIN’

Piştre li ser navê MLKP’ê Huseyin Yeter axivî, qala têkoşîna Nûnerê MLKP yê Rojava Baran Serhat kir û got; “Hevrêyê me roja 23’ê Adarê di encama komployekê de şehîd bû. Li Rojhilata Navîn şoreş wê belavî hemû cîhanê bibe û ji ber vê tirsê çawa bi komployekê Mam Zekî şehîd kirin, komployek din kirin. Duh ciwanên Pirsûsê, îro hevalê me Baran Serhat ji bo asteng kirina şoreşa yekbûyî qetil kirin.”