Li ser banga lezgîn a Meclîsa Xweseriya Demokratîk a Şengalê, danê êvarê li gelek welatên Ewropayê çalakiyên şermezarkirinê hatin lidarxistin.

MARSÎLYA

Aktîvîstên tevgerên ciwanan TÊKO-JIN û TCŞ'ê roja Duşemê saet di 19:00 de li kolanên Marsîlyayê çalakî kirin.

Ciwanan wêneyên Rêberê Gelê Kurd Abdullah Ocalan, alên PKK, TCŞ, YPG û YPJ'ê hildan û rê li trafîkê girtin.

Çalakgeran dirûşmên "Dewleta Tirk a faşîst rawestînin", "Ji bo statuya Kurdistanê bêdeng nemîne" û "Bijî Serok Apo" qîriyan û pankarta bi nivîsa "Li dijî dagirkirina Şengalê serî hilde" hildan.

ESSLÎNGEN

Çalakiyeke din a bi heman armancê ya bêîteatiya sivîl li bajarê Esslîngen ê Elmanyayê pêk hat.

Di çalakiyê de hevkariya PDK'ê ya bi dewleta Tirk re hate şermezarkirin.

Ciwanan ji bo Şengalê û Rêberê Gelê Kurd Abdullah Ocalan dirûşm qîriyan û veguhastina bi hezaran leşkerên Iraqê ber bi herêma Şengalê ve şermezar kirin.

Ciwanan her wiha bi wêneyên Ocalan û alên PKK'ê jî qedexeya li ser PKK'ê ya li Elmanyayê şermezar kirin.