Tûra duyemîn a hilbijartinên xwecihî yên Şaredariyên Kantona Cenevreyê ya Swîsreyê di 13'ê Nîsanê de ye. Namzetê Partiya Keskan, Endamê Konseya Rêveber a Şaredariyê û Şaredarê dema beriya niha Alfonso Gomez ku di tûra destpêkê de cihê xwe di rêza duyemîn de girt û xwe ji bo tûra duyemîn amade dike, li ser pêvajoya bi pêşengiya Rêber Apo tê meşandin ji ANF'ê re axivî.

Alfonso Gomez anî ziman ku ew banga 'Aştî û Civaka Demokratîk' a Rêber Apo gelekî erênî dibîne û got, "Yek ji wan kesan im ku piştgiriyê didim vê banga aştiyê. Cenevre paytexteke mafên mirovan e, di heman demê de paytexta aştiyê ye. Her tim vê yekê dibêjim: Ji bo her kesên ku dixwazin li ser aştiyê biaxivin deriyê Cenevreyê vekirî. Yên ku dixwazin hurmetê nîşanî mafê diyarkirina çarenûsê yê gelan û mafên demokratîk bidin, li vê derê her tim bi kêfxweşî têne pêşwazîkirin.

Bêguman bi kêfxweşî banga Birêz Ocalan pêşwazî dikim. Ji ber ku mixabin trajediya gelê Kurd bi dehan salan dewam dike. Ji ber şerê navxweyî û şerê azadiyê -ku divê em vî şerî bi rengekî rast bi nav bikin- bi sed hezaran mirovan jiyana xwe ji dest dan û êşên gelekî giran hatin ikşandin. Gelek Kurd neçar man Tirkiyeyê biterikînin û weke li welatên din li Swîsreyê jî ji xwe re li stargehekê geriyan.

Lewma hewldanek ji bo nasnakirina aliyên şer û aştiyê hewldaneke gelekî girîng e. Ji ber ku ji bo pêkanîna aştiyê divê aliyê dijber bê naskirin, daxwazên wan bêne qebûlkirin û ji bo van daxwazan alî danûstandinan bikin. Lewma piştgiriyê didim vê bang û hewldanê."

Alfonso Gomez destnîşan kir ku divê civaka navneteweyî zextê li dewleta Tirk bike û got, "Her wiha ji bo destpêkirina danûstandinan û danîna çekan bangek heye. Tê xwestin, pêvajoyeke aştiyê destpê bike. Lewma divê civaka navneteweyî tevlî vê pêvajoyê bibe. Weke kesekî ku mohra xwe daniye binê vê bangê, ez daxwaza ji bo aştiyê bi kêfxweşî pêşwazî dikim.

Dema ku min mohra xwe danî binê vê bangê, min xwest vê yekê destnîşan bikim. Gelek siyasetmedarên li welatên cuda jî dixwazin zext li Tirkiyeyê bê kirin û piştgirî ji vê pêvajoyê re bê dayin.

Em zanin ku gelê Kurd daxwaza aştiyê dike, ev yek şênber e, lê belê em zanin ku di heman demê de pêşniyareke welê kiriye ku ne hêsan e. Piştî şerekî ji dehan salan danîna çekan biryareke hêsan nîne. Lê belê ji bo destpêkirina danûstandinan vê gavê diavêjin. Em jî divê bi rayedaran re ya ku ji destê me tê bikin û Tirkiyeyê li dora maseya danûstandinan bidin rûniştandin."

Namzetê Partiya Keskan a Swîsreyê Alfonso Gomez anî ziman ku destpêkirina danûstandinan gelekî girîng e û got, "Em bala xwe bidin ser mînaka li Efrîkaya Başûr. Wê demê daxwaz û zexta navneteweyî hebû. Hikumeta Efrîkaya Başûr li girtîgehê bi Nelson Mandela dest bi danûstandinan kir. Ev hevdîtin ne tenê Mandela serbest berda, di heman demê de derfet da pêvajoya danûstandinan ku dewam bike.

Ev yek nayê wê wateyê ku nîqaşên li ser serbestberdana Ocalan bi dawî bibe. Berevajî ji bo destpêkirina danûstandinan şertekî pêş ê girîng e. Eger hûn dixwazin danûstandinan bikin, weke nîşaneya nêta xwe ya baş divê hûn hin gavan biavêjin. Yek ji van gavan jî berdana hin mehkûmên siyasî ye. Di nava van de Birêz Ocalan jî wê azad bibe. Bi vî rengî wê alî li dora maseyê rûnên û karibin bibêjin, 'Ça em pêvajoyê çawa dikarin bi pêş ve bibin?'

Lê belê helwesta heyî ya Birêz Erdogan min dixe nava fikaran. Ev yek nayê wê wateyê ku ev rewş wê neyê guhertin. Lê belê zehmet e ku mirov niha xweşbîn bin."

Alfonso Gomez destnîşan kir ku eger aliyên pêvajoyê bixwazin ew dikarin wan li Cenevreyê bikin mêvan û got, "Em ê kêfxweş bin ku bi vê rolê rabin. Jİ bo hevdîtin bi pêş ve biçin em ê hemû derfetan pêşkêş bikin. Ev yek wê ne tenê ji aliyê rêveberiya bajarê Cenevreyê ve bê kirin; bi dîtina min wê rêveberiya kantonê, her wiha Konfederasyona Swîsreyê jî vê firsendê binirxîne û ji bo pêşvebirina danûstandinan tevkariyê bike."