Kurdistanî tevî dostên xwe doh saet 18:30'î li parka Rolambshovê li hev civiyan û agirê Newrozê dadan.

Beşdarên pîrozbahiyê li ber stranên hunermend Gursel Dayan govend gerandin.

Hevserokên Navenda Civaka Demokratîk a Kurd a Stockholmê bi wesîleya pîrozbahiyên îsal ji ANF'ê re axivîn.

YÎGÎT: GELÊ KURD WÊ 31'Ê ADARÊ BERSIVÊ BIDE FAŞÎZMA AKP-MHP'Ê

Mîrhem Yîgît bal kişand ser berxwedana grevên birçîbûnê ya bi pêşengiya Leyla Guven tê kirin û got, "Li pêşiya me hilbijartinên xwecihî yên 31'ê Adarê hene. Gelê Kurd û hêzên demokratîk wê bi biryardariya berxwedana Newrozê dersa pêwîst bidin faşîzma AKP-MHP'ê."

KASIRGA: JINÊN KURD WÊ DAWÎ LI TECRÎDKIRINA OCALAN BÎNIN

Gîren Kasirga jî işaret bi berxwedana bi pêşengiya Leyla Guven kir û anî ziman, ew Newroza îsal weke Newroza jinan dibînin, bi vî rengî xwedî lê derdikevin û diyarî Guven û çalakgerê fedayî Zulkuf Gezen dikin.

Kasirga da xuyakirin ku tecrîd ne tenê li Rêberê Gelê Kurd Abdullah Ocalan tê ferzkirin û got, "Gelê me tê tecrîdkirin. jinên Kurd wê bi îrade û daxwaza xwe ya têkoşînê tecrîdkirina Ocalan bi dawî bikin."

Di dawiya çalakiyê de ji bo pîrozbahiya Newrozê ya li Stockholmê ya 23'ê Adarê saet 17:00 a li Solna Hallenê banga tevlîbûnê hate kirin.