Komîsyona Ekolojiyê ya Şaxa Edeneyê ya Komeleya Mafê Mirovan (ÎHD) di salvegera 73’emîn de ya ku DYA’yê bombeyên nukleerî avêtibû bajarên Nagazakî û Hîroşîmayê yên Japonyayê, civîneke çapemeniyê li dar xist.

Endamê Komîsyona Ekolojiyê ya Şaxa Edeneyê ya Komeleya Mafê Mirovan Raîf Bozdemîr di civînê de axivî û diyar kir ku cara pêşîn di 6’ê Tebaxa 1945’an de bombeyên nukleerî hatiye bikaranîn.

Bozdemîr bi bîr xist ku li bajarên Nagazakî û Hîroşîmayê bi carekê re bi sed hezaran kesan jiyana xwe ji dest dane û kesên ku ji karesatê filitîne jî nexweşiyên wan ên genetîk hene û ev nexweşî bi neviyên van kesan jî heye.

Bozdemîr got ku, “Enerjiya nukleer gelekî bi xeter e, heke teqîn pêk neyê jî radyasyonê çêdike û gelekî biha ye. Ew ê mirovahî karesatên li ser Hîroşîma û Nagazakiyê ji bîr neke. Em li Akkûyû, Sînop û li cîhanê santralên nukleer naxwazin. Santralên nukleer binpêkirina mafên mirovan e, em ê destûrê nedin vî tiştî.”