Jinên Colemêrgê bi penêr, rûn û berhemên din ên ji sewalên ku li zozanan xwedî dikin debara xwe dikin.

Penêr, rûn, şîr û mastê ku amade kirin, dixin bîdonan. Piraniya van berhemên xwe li bajêr difiroşin, yên mayî jî zivistanê dixwin.

Zeynep Ozer diyar kir ku ev kar ji pêşiyên wan mane û got, li zozanan ew bi hev re kar dikin. Ozer destnîşan kir ku ew naxwazin jiyana li zozanan bi dawî bibe.

Hamîde Îhtiyatoglû jî bal kişand ser şert û mercên zehmet ên li zozanan û anî ziman, ew neçar in vî karî bikin ku karibin debara xwe bikin. Îhtiyatoglû diyar kir, li Colemêrgê karekî din nîne ku bê kirin û got, "Bi van berheman em debara xwe dikin. Em di nava şert û mercên giran de dixebitin. Salekê em îdare dikin. Tevî her tiştî jî jiyana li zozanan xweş e. Em ê jî vê jiyanê bidomînin."