Ji bo piştgiriya grevê birçîbûna ya di girtîgehan de, greva birçîbûnê a 14’ê Nîsanê li Hannoverê  ket  roja 4’emîn. Komeke ku ji 17 kesan pêk tê, çalakî dewr stendin û komê bi dirûşmeyan girtî silav kirin. 

Berdevkê komê Huseyîn Şengalî axivî û got:

‘ENCAM WÊ MÛHTEŞEM BE'

“Ev berxwedan beriya çend salan li Îmraliyê ji aliyê Serok Ocalan ve hate destpêkirin. Pêl bi pêl belav bû, gihîşt Şengalê, Rojava û Bakurê Kurdistanê. Herî dawîyê jî li ev bajarên ku xirabûn, lê bi serbilindî piya man yên wekî Cizîr, Nisêbîn, Sûr, Şirnex, Geverê berhema xwe da û ber bi dawiyeke bi mûhteşem ve diçe. Me bi vê rih û ramanê dest bi çalakiya xwe kir.” Şengalî diyar kir ku ew ê çalakiya xwe bilintir bikin.

 Şengalî ragihand ku, em vê referandûma ku bi dek dolap, êrîş û bêqanûnî hatiye kirin tu caran qebûl nakin, ji bo me tu rewabûna wê nîn e.

Konê çalakiyê ji aliyê xebatkarên saziyên Elman, Tevgerên Çep ên Tirkiyeyê û Kurdistaniyan ve tê ziyaret kirin. Komê bi dirûşmeyên “Bijî berxwedana zindanan” , “Bijî Serok Apo” daxuyaniya xwe bi dawî kirin.