Rêxistina bi navê ‘Komîteya Berxwedanê’ ku li başûrê Hartûmê di nava şêniyan de piştevaniya hevbeş bi rêve dibe ragihand ku, di encama bombebaranên li ser qadeke niştecihbûnê û li sûka herêmî de 30 sivîl hatine kuştin.

Komîteya hiqûqnasên alîgirê demokrasiyê ragihand ku, 33 sivîl mirine û ji van 23 kes ji ber êrîşên hewayî yên artêşê jiyana xwe ji dest dane.

Artêşa bi serkêşiya General Abdul Fettah el Burhan û Hêzên Desteka Lezgîn (HDK) ên bi serokatiya General Muhammed Hamdan Daglo ji 15'ê Nîsana 2023'an û vir ve şerê desthilatdariyê dikin.

Li gorî texmînên rêxistina sivîl a bi navê Projeya Daneyên Cih û Bûyerên Şerê Çekdarî (Acled), di vî şerî de zêdeyî 12 hezar kes mirin. Li gorî NY'ê zêdetirî 7 mîlyon kes jî ji cih û warên xwe bûne.

Tevî hewldanên dîplomatîk ji bo muzakereyên aştiyê û tevlîbûna DYE, Erebîstana Siûdî û bloka herêmî ya Rojhilatê Efrîkayê IGAD’ê jî pevçûnên di navbera her du aliyan de nehat rawestandin.