Berdevkê Yekîneyên Parastina Gel (YPG) Nûrî Mehmûd diyar kir ku îdîayên dibêjin, 'Hêzên YPG/YPJ wê tevlî operasyona Îdlibê bibin' ne rast e.

Nûrî Mehmûd da zanîn ku bi zêdebûna îhtîmala operasyoneke leşkerî ya li ser parêzgeha Îdlibê û hawirdora wê, hin saziyên çapemeniyê qala tevlîbûna hêzên wan di nav vê operasyonê de dikin.

Mehmûd tekez kir ku îdîayên bi vî rengî bi armanca spekulasyonê tên belavkirin û dûrî rastiyê ne.

Berdevkê YPG'ê di dewama daxuyaniyê de got, "Em ji raya giştî re tekez dikin; weke Yekîneyên Parastina Gel (YPG) û Yekîneyên Parastina Jinê (YPJ), hêzên me li hember rêxistineke terorê (DAIŞ) di nava şerekî giran de ne û bi biryar in ku vê koma terorê li Bakurê Sûriyeyê tune bikin."

Nûrî Mehmûd di dawiyê de got: "Em di serî de li hember artêşa Tirk a dagirker ku li Efrînê hewl dide hebûna xwe meşrû nîşan bide û rêxistina terorî DAIŞ'ê ku alîkarî ji dewleta Tirk a dagirker digire, şerekî meşrû û mafdar dikin. Her wiha em tekez dikin ku ti hêza me li Îdlibê nîne."