Fermandariya Giştî ya Hêzên Sûriya Demokratîk (QSD) ji bo bîranîna şehîdên Yekîneyên Antîterorê (YAT) daxuyaniyek da. 

Di daxuyaniyê de hate gotin: "Îro salvegera yekemîn a şehîdbûna fermandar û şervanên YAT`yê ye ku di encama ketina 2 helîkopteran de dema diçûn Silêmaniyê li Başûrê Kurdistanê şehîd bûne.

Şehîd Şervan Cûdî, Diyar Dêrik, Feraşîn Baran, Harûn Rojava, Dogan Efrîn, Hogir Dêrik, Koçer Dêrik, Rojeng Rifet û Xebat Dirbêsiyê sembolên cesaret û lehengiyê ne. Her wiha di hemû pêvajoyên têkoşîna Bakur û Rojhilatê Sûriyeyê de cihê xwe girtin û di gelek şerên li dijî teror û dagirkeriyê de serkeftin misoger kirin.

Hemû hevrêyên me yên şehîd bi pêşengiya şehîd Şervan Cûdî bi aweyekî aktîv û bi pisporiyeke mezin di pêngavên li dijî çeteyên DAIŞ`ê de tev li nava Yekîneyên Antîyerorê bûn. Di heman wextî de jî rolên pir mezin di çalakiyên ku li dijî serçeteyên DAIŞ`ê de li dar dixistin, lîstin. Li kêleka wê jî bi Hevpeymaniya Navdewletî re karên hevbeş dimeşandin.

Wan her 9 şehîdan têkoşîna xwe ya şoreşgerî û islûba xwe ya jiyanê di şoreşa Bakur û Rojhialtê Sûriyeyê de, kirin pirek ji bo ku gel bigihêje azadiyê û ewlehiyê.

Em wan bi rêzdarî bi bîr tînin û careke din soz didin ku rêya şehîdan berdewam bikin ku bi xwîna xwe û fedakariyên xwe xêz kirine. Ji bo ku em armancên şoreşê û azadiyê bi dest bixin û welatekî ewle bê teror û dagirkerî ava bikin.”