Hêzên Sûriyeya Demokratîk (QSD) daxuyaniyek da çapemeniyê û dest bi pêngava rizgarkirina bajarokê Dişîşa û parastina sînorê Sûriye û Iraqê kir.

Daxuyanî li gundên başûrê rojhilat ê Hesekê ji aliyê Berdevka Fermî ya Pêngava Bagera Cizîrê Lîlwa El-Ebdulah ve xwendin.

PÊNGAV JI BO PARASTINA SÎNOR Û PAQIJKIRINA GUNDEWARÊN HESEKÊ YE

Daxuyanî wihaye:

"Di çarçoveya qonaxa duyemîn a Pêngava Bagera Cizîrê de, piştî ku bajarokê Baxozê hate rizgarkirin û dor li herêmên ku çeteyên DAÎŞ'ê lê ne hate girtin, hêzên me niha dest bi pêngava rizgarkirina bajarokê Dişîşa yê Hesekê dikin.

Pêngava rizgarkirina Dişîşa ji bo parastina sînorê Sûriye û Iraqê û paqijkirina hemû gundên parêzbeha Hesekê ji çeteyên DAÎŞ'ê ye. Li herêmeke ji 3 hezar kîlometreçargoşeyî yên parêzgeha Hesekê terorîst hene. Navenda vê herêmê jî bajarokê Dişîşa ye.

BI PÊNGAVÊ RE WÊ HERÊMÊN RIZGARKIRÎ EWLE BIBIN

Pêngava rizgarkirina Dişîşa li ser esasê planek ku berê hatiye amadekirin dest pê dike û wê bi artêşa Iraqê û Koalîsyona Navdewletî re bi rengekî koordîneyê bê meşandin. Hêzên me li gorî wê plan û şêwira hevbeş a ji bo tinekirina terorê û têkbirina wê  ber bi bajarokê Dişîşa ve biçin. Armanc parastina ewlekarî û aramiya herêmên rizgarkirî û şêniyên herêmê yên salên derbasbûyî gelek zilm û zordarî ji destê çeteyan kişandin.

Ev daxuyaniya me piştî çend saetan ji tevgera hêzên me ya li ser erdê li dijî DAÎŞ'ê pêk hatiye. Armanca me ji vê hemleyê rizgarkirina tiştê maye ji xaka başûrê rojhilatê Hesekê ye.

Pêngava me ya Bagera Cizîrê ji ber êrîşên Artêşa Tirk û çeteyên wê ya li ser kantona Efrînê hatibûn rawestandin. Lê hêzên me QSD 1'ê Gulana derbasbûyî careke din dest bi pêngavê kirin.

Di çarçoveya qonaxa duyemîn a pêngavê de hêzên me pêş ketin û herêmek berfireh ji xaka ku gundê Baxoz jî di nav de rizgar kir. Ev pêngava ku hêzên me ragihandiye bi armanca rizgarkirina tiştê maye ji gundên başûrê rojhilatê Hesekê û paqijkirina xeta sînorê me ya bi Iraqê re ye."