QSD’ê du roj berê li rojhilatê Firatê li herêma Dêrazorê operasyonek dabû destpêkirin.

QSD’ê îro bi daxuyaniyekê bîlançoya 2 rojên dawîn a Pêngava Bagera Cizîrê eşkere kir.

Daxuyaniya QSD’ê wiha ye:

"Li aliyê rojhilatê gundê El-Baxoza Jorîn, hêzên me di 10`ê Îlona 2018`an de 3 kîlometre pêşde çûn. Şer sîng bi sîng di navbera wan û çeteyan de derket. Di encama wê de çeteyan gelek zerar dît û 10 nuqteyên bicihbûna çeteyan hatin rizgarkirin. Her wiha hêzên me di roja duyemîn de kîlometreyekê pêşde çûn û 7 nuqte ji çeteyan rizgar kirin.

Di wî şerî de balafirên koalîsyonê 3 caran çete kirin hedef.

Di şerê vî baskî de, 4 şervanên me birîndar bûn û me ew ji bo tedawiyê rakirin nexweşxaneyê. Her wiha mayinek bi buldozereke hezên me ve teqiya û tenê zerarên maddî çêbûn.

Eniya El-Kesra: Hêzên me li gelek aliyan pêşve çûn. Di roja yekem û duyemîn de 6 kîlometre bi pêş ve çûn. 10 nuqteyên çeteyan hatin rizgarkirin. Li wê derê şerê giran ê rû bi rû di navbera hêzên me û çeteyan de çêbû. Her wiha balafirên koalîsyonê 7 caran li çeteyan da.

Yek ji fermandarên hêzên me tekez kir ku hêzên wan di wî şerî de 41 çete kuştin, gelek alavên leşkerî, cebilxane û wesayîtên çeteyan rûxandine. Her wiha 6 şervan jî şehîd bûn.

Heta niha li wê derê şerekî dijwar didome û çete bi hemû hêza xwe hewl didin pêşveçûna hêzên me asteng bikin.ʺ