Mihemed Bekir Hisên 21 salî yê ji gundê Dimiliya dema li Tirkiyeyê kar dike, rojekê polîsên Tirk bi hinceta ku bi qaçaxî derbasî Tirkiyeyê bûye, wî dibin ser sînor û ji wir wî dişînin Îdlîbê. Piştî 6 mehan êşkencekaran ji malbata wî pere xwestin. Ligel ku malbatê pere dan jî, çeteyan ew bernedan û ew kuştin.

Apê wî Arêf Mihemed li ser bûyerê axivî û got ku “Em koçberê Efrînê ne. Ji ber şer û dagirkeriyê em ji cih û warê xwe derketin û em niha li Til Rifatê ne. Beriya vê du rojan me li ser facebook û televîzyonê dît ku biraziyê min bi darê zorê birine Îdlîbê û çeteyên Heyet Tehrîr El Şam ew kuştine.

Çend meh berê polîsên Tirk hemû ciwanên ku bi qaçaxî hatine Tirkiyeyê wan digirin û wan dişînin ser sînor. Ji wir jî wan dişînin Bab El Hewayê. Piştî êşkencekirinê ji bavê Mihemed pereyan dixwazin û dibêjin heke pere were şandin, em ê wî berdin. Malbat berê 4000 dolar dişîne lê çeteyên Heyet Tehrîr El Şam wî bernadin. Piştî du mehan 2000 dolaran ji malbatê dixwazin, malbat qebûl dike lê dîsa jî Mihemed bernadin. Mihemed 6 heyvan di zindanê de dimîne. Di 12.12.2019’an de çete ji Mihemed dixwazin ku bila telefonî malbata xwe bike û bibêje ev roja min a dawîn e. Mihemed telefonî birayê xwe dike û piştî 5 deqîqeyan guleyan bera Mihemed didin. Çete ji malbatê dibêjin werin cenazeyê xwe bibin, dema ku birayê min dibêje derfetê me tuneye ku em cenaze bibin. Çete hemû organên Mihemed derdixînin û cenaze didin malbatê. Ev hovîtiya Erdogan e. Em bang li hemû saziyên mafên mirovan û cîhanê dikin ku bila li ser vê bûyerê bisekinin. Êşkenceyek giran li biraziyê min kirine. Erdogan piştgiriyê dide çeteyan û ev çete sûcên li dijî mirovatiyê dikin. Ji ber van kiryaran divê Erdogan were darizandin, ji ber ku ew sûcdarekî mezin e.”