Encamnameya konferansa bi mijara, “Piştevaniya Partiyên Çep ên Ewropayî bi Gelê Kurd re” ya li Amedê ji aliyê HDP, KCD, DBP û KJA hat organîzekirin hat eşkerekirin. Ji bo pêvajoya aştiyekê hat xwestin ku tecrîda li ser Rêberê Gelê Kurd Abdullah Ocalan bê rakirin û YE ji PKK’ê re nebêje ‘rêxistinek terorî’.

Endama Parlamentoyê ya Partiya Çep a Elman Heîke Hansel encamnameya konferansê xwend.

Li gor xalên di encamnameyê de ji bo pêvajoyeke aştiyekê hat xwestin ku tecrîda li ser Rêberê Gelê Kurd Abdullah Ocalan bê rakirin û YE ji PKK’ê re nebêje ‘rêxistinek terorî’.

Hansel piştî encamname xwend, bal kişand ser rewşa malbatên ku bi rojan e hewl didin cenazeyên zarokên xwe yên li Sûrê hatine qetilkirin wergirin. Hansel wiha axivî: “Dayik nikaribin cenazeyên zarokên xwe bigirin, ev nîşaneyek hovîtiya rejîma Erdogan e. Ev nayê qebûlkirin û sûcek e.”

Piştî encamnameyê, heyeta di nav de Parlamentera HDP’ê ya Amedê Feleknaz Ûca, Berdevka KJA Ayla Akat Ata û nûnerên Partiyên Çep ên Ewropa cih girtin, berê xwe dan Sûrê.