Di çarçoveya operasyona rizgarkirina Reqayê de hêzên QSD'ê derbasî nava du taxên din bûn. Li van her du taxan şerekî giran diqewime. Li gorî agahiyên gihîştin ber dest, di şer de 31 çete hatine kuştin û gelek çekên çeteyan hatine desteserkirin.
Pêngava Rizgarkirina Reqayê di roja 27. de ye. Şevê din şervanên Hêzên Sûriyeya Demokratîk (QSD) derbasî nava taxa Hîşam Ebdilmelek a başûrê bajar bûn. Li vir şerekî giran di navbera şervanan û çeteyan de rû da. Şerê li vir hîn jî didome. Li gorî agahiyên hatin bidestxistin, hejmarek çete hatine kuştin, termên 7 ji wan tevî çek û cebilxaneyên wan li naverastê mane.
Li aliyê rojavayê bajarê Reqayê jî, şervanên QSD'ê ketin taxa Yermûk û li vir şerekî giran dest pê kir. Di encamê de 9 çete hatin kuştin, depoyeke cebilxanê û mayînan ket destê şervanan.
Wekî din li başûrrojhilatê Reqayê jî şervanên QSD'ê ber bi gundê Retla ve pêş de çûn. Li wir jî şerekî dijwar di navbera şervanan û çeteyan de rû da. Di encamê de nîvê gundê Retla ji aliyê şervanan ve hatiye rizgarkirin.
