Girseya gel piştî ku darbesta cenazeyê şehîd Haşim Mûstefa wergirtin, ji Çerxeriya El-Elem ber bi Goristana şehîd Mehmûd Tuhmê ya li gundê Tenhûzê ve ketin rê. Girseya gel alên YPG’ê, YPJ’ê, QSD’ê û TEV-DEM’ê bilind kirin.

Di merasîmê de Hevseroka Rêveberiya Xweseriya Demokratîk Zelîxa Ebdî û endamê Rêveberiya TEV-DEM’ê Selahedîn Ferat û bi sedan welatiyên ji pêkhateyên herêmê amade bûn.

Li goristanê li gel bi deqeyek rêzgirtina leşkerî merasîm destpê kir. Paşê jî hevserokê Meclîsa Malbatên Şehîdan a Girê Spî Wehîd Ebdullah, Endamê Kongra Star Muna El-Eswed û Endamê Rêveberiya Komîteya Lihevanînê şêx Îbrahîm El-Îsa axivîn.

Axaftvanan sersaxî ji malbata şehîd û hemû gelên Bakurê Sûriyeyê re xwestin û diyar kirin ku bi saya fedekariya şervanan û xwîna şehîdan ev destkeftiyên Bakurê Sûriyeyê hatine bidest xistin û van ciwanan ji bo mirovahiyê û azadiyê û biratiya gelan xwîna xwe feda kirine.

Di dewama merasîmê de nasnameya şehîd Haşim Mûstefa hate xwendin û radestî malbatê hate kirin.

Di dawiya merasîmê de jî cenazeyê şehîd bi dirûşma ‘Şehîd namire’ spartin axê.