2 şervanên YPG'ê û şevanekî Hêzên Şoreşger li Efrînê, 4 şervanên YPG'ê jî li Hesekê hatin veşartin.

EFRÎN

Gelê Efrînê û herêma Şehbayê du şervanên YPG’ê ku di şerê dijî çeteyên dewleta Tirk de û Pêngava Rizgarkirina Reqa de jiyana xwe ji dest dan hatin veşartin.

Şêniyên Efrîn û Şehbayê cenazeyê şervanên YPG`ê Luqman Mustefa (Hekîm Efrîn) û Hisên Xelîl (Kemal Bekir) ku dema bersiva êrîşên  çeteyên  artêşa Tirk a dagirker Ii ser Efrînê dan  şehîd bibûn û  cenazeyê şervanê Hêzên  Şoreşger Ebdulmunem Xalid ku di Pênava Rizgarkirina Reqayê de şehîd bibû, ji nexweşxaneya Avrîn wergirtin û bi karwanekî ji wesayitan berê xwe dan Goristana Şehîd Seydo ya li navçeya  Cindirêsê ya Kantona Efrînê û gundê  Merîmîn a navçeya Şera.

Li Goristana Şehîd Seydo  merasîmeke leşkerî ji  aliyê şervanên YPG û YPJ`ê ve hate kirin. Paşê  Hevseroka  Desteya Karûbarên  Civakî ya Efrînê Erîfe Bekir û Hevserokê Meclîsa Malbatên  Şehîdan Ehmed Ebdo, axivin.

Qisekeran sersaxî ji malbatên şehîdan  re xwestin û soz dan ku rêya wna bişopînin.Her wiha  axaftivanan tekez  kirin ku xwîna gelê Kurd û Ereb tevlîhev bûye û ev yek isbat dike ku gelê Bakurê Sûriyê yek e.

Piştî axaftinan, wesiqeta her du şehîdan ji aliyê Endama KPC-Demokratîk Mizgîn Hec Mihemed ve hate  xwendin  û radestî malbata wan hate kirin. Merasîm bi veşartina her du  şehîdan  bi dawî bû.

Her wiha cenazeyê têkoşer Hêzên Şoreşger li gundê Merîmîn a navçeya Şera hate veşartin.

LI HESEKÊ 4 ŞEHÎD HATIN VEŞARTIN

Gelê bajarê Hesekê û gundewarên wê, cenazeyê  4 şervanên YPG`ê ku di  Hemleya Rizarkirina Reqayê de şehîd bibûn, li Goristana Şehîd  Dijwar a li gundê El-Dawîdiyê veşartin.

Gel cenazeyê Husam Kerîş (Esed Hesekê), Ehmed Berekat (Bekdaş Hesekê), Sîpan Hiso (Egîd  Hesekê) û Mustefa Hisên (Şemdîn Hesekê), ji Meclîsa Malbatên Şehîdan a Hesekê wergirtin û bi karwanekî heybet berê xwe dan Goristana Şehîd Dijwar.

Li goristanê merasîma veşartinê bi merasîmeke leşkerî ji aliyê şervanên YPG û YPJ`ê ve hate kirin. Paşê Endamê Meclîsa Malbatên Şehîdan Bengîn Badînî axivî û  rola şehîdan di rizgarkirina ax û gel ji çeteyan bi bîr xist.

Her wiha  yek  ji Fermandarên YPJ'ê Mehabat Koçer jî di merasîmê de axivî û  da zanîn ku xwîna  şehîdan li  ser vê axê ji bo yekîtî û azadiyê hatiye rijandin û  tekez kir ku gelên herêmê bi yekîtiya xwe dikarîbûn li hemberî destên  ku destwerdana herêmê bikin, bisekinin.

Koçer soz da ku di rêça şehîhan de bimeşin û tolê hilînin. Piştî axaftinan, Endama Meclîsa Malbatên Şehîdan Îlham Bekir wesîqeta her çar şehîdan xwend û radestî malbata wan kir.

Merasîm bi veşartina cenazeyên her çar têkoşeran bi dawî bû.