'Ji bo azadiya fîzîkî ya Rêber Apo em ê li qadan bin'
Şêniyên herêma Firatê li dijî tecrîda li ser Rêberê Gelê Kurd Abdullah Ocalan nerazîbûnên xwe anîn ziman û gotin, “Ji bo azadiya fîzîkî ya Rêber Apo em ê bi şev û roj li qadan bin.”
Li dijî tecrîda girankirî ya li ser Rêberê Gelê Kurd Abdullah Ocalan nerazîbûn dewam dikin. Welatiyên Herêma Firatê diyar kirin ku heta azadiya fîzîkî ya Abdullah Ocalan pêk were, dê li qadan li ber xwe bidin.
‘EM DIXWAZIN AGAHÎ JI RÊBERÊ XWE BIGIRIN’
Cîhan Bozan anî ziman ku, Abdullah Ocalan ji bo wan hebûn û destpêka jiyaneke nû ye û wiha got, “Rêberê me di encama komployek navneteweyî de dîl hate girtin. Qaşo dewletên parastina maf dikin, dibêjin em parastina mafê gelan dikin. Lê ev dewlet ji bo berjewendiyên xwe xwedî li tiştekî dernakevin. Mafekî herî rawaye ku Rêber Apo bi parêzer û malbata xwe re hevdîtin pêk bîne. Lê ev maf ber çavê cîhanê tê astengkirin. Em dixwazin agahî ji Rêberê xwe bigirin, divê ev rewş bê zelalkirin. Armanca dijmin têkiliya di navbera gel û Rêbertî qut kirine. Lê divê bê zanîn ku fikrên Rêber Apo di nav dil û mejiyê me de hatiye çandin. Em bi Rêber Apo re dijîn. Dijmin dixwaze em teslîm bibin û dev ji doza xwe berdin. Lê bila baş bizanibin em ê zîndana Îmraliyê hilweşînin û Rêberê xwe azad bikin."
’DIVÊ TEVAHÎ GELÊN BINDEST RABIN SER PIYAN’
Emîna Yasîn jî destnîşan kir ku Serokkomarê Tirkiyeyê Recep Tayîp Erdogan bûye sedema gelek komkujiyan û got ku divê Erdogan bê cezakirin û girtin. Yasîn anî ziman ku divê Rêberê Gelê Kurd Abdullah Ocalan demildest bê azadkirin û wiha dewam kir, “Weke dayikên şehîdan em ê zîncîra Îmraliyê bişkînin û Rêberê xwe di aliyê fîzîkî de azad bikin. Divê em hemû Kurd û tevahî gelên bindest rabin ser piyan. Azadiya Rêber Apo azadiya me ye. Heta Rêber Apo azad nebe, em jî azad nabin. Em ê bi berxwedaniya xwe azadiya Rêber Apo ya fîzîkî misoger bikin."
‘JI BO AZADIYA FÎZÎKÎ YA RÊBER APO EM Ê LI QADAN BIN’
Rûken Temo jî da zanîn ku, heta azadiya fîzîkî ya Rêberê Gelê Kurd Abdullah Ocalan misoger bikin, wê weke ciwanên Kurd li qadan di nava çalakiyan de bin û got, “Bi ruhê ciwantiyê em ê Rêberê xwe di aliyê fîzîkî de azad bikin. CPT’yê piştî 6 mehan daxuyanî da, lê têkildarê rewşa Rêberê me agahiyên zelal neda. Em ê bi berxwedana xwe azadiya fîzîkî ya Rêber Apo pêk bînin."
