Piştî ku dewleta Tirk bi rengekî eşkere ragihand ku dest bi amadekariyên dagirkeriyê dike, li navçeya Tirbespiyê bi hezaran kes daketin qadan û li dijî dewleta Tirk meşiyan.

Meşê ji ber avahiya Kongreya Star a li navçeyê dest pê kir û alên QSD û TEV-DEM'ê hatin hildan. Di meşê de pankartên "Na ji Osmaniya nû re" û "Bijî yekitiya gelan" dest pê kir. Li rexê jî dirûşmên şermezarkirina dagirkeriya Tirk û banga berxwedanê hat berz kirin.

Girseya gel di sûka navendî ya navçeyê re di nava girtina tevahî dikanan de û beşdariya xwediyên wan derbas bû. Meşvan li pêş Akademiya Şehîd Yekta Herkol a navçeya rojava sekinîn. Dûre deqeyekê rêz hate girtin. Piştre hevserokê meclisa navçeya Tirbespiyê Abdulrehmî Hiso, bi navê PYD’ê rêveber Silêman Bedir û bi navê Kongreya Star Mewa Xelîfe axivîn.

Qisekeran bang li yekitiya ref û sekinandina li hember gefên Tirkiyê kir û tekez kir ku ev gef bi armanca temamkirina komployên li dijî gelê herêmê û têkbirina vîna azad in.

Qisekeran diyar kirin ku dewleta Tirk hewl dide senaryoya Efrînê vegerîne û anîna çeteyên wê ya li ser sînor, pêkanîna siyaseta dagirkirina herêmê ye. Li rexê jî gefên Tirkiyê hatin redkirin û banga QSD’ê ya yekitiya refan li hember dijminatiya Tirkiyê hate kirin.

Meş bi mîsogerkirina berxwedanê bi dawî bû.