Şervanê QSD'ê Rêber Temor (Şiyar Şêran) ji navçeya Şêran e, dema erka xwe bi cih dianî di encama qeyrana dil de şehîd bû. Endamê Tevgera Ciwanên Şoreşger a Sûriyê  Mesûd Îbrahîn (Behdînan Kobanê) ji gundê Ziravkê ye, 25'ê Kanûnê di encama êrîşa hewayî ya dewleta Tirk a dagirker li Kobanê de bi giranî birîndar bûbû û li nexweşxaneyên bajarê Minbicê de şehîd bû.

Girseya gel cenazeyên şehîdan ji deriyê ketina bajarê Kobanê wergirtin û bi kerwanekî ber bi Goristana Şehîd Dîcle ve ketin rê. Kerwanê cenaze li goristanê ji aliyê sedan kesî ve hat pêşwazîkirin.

'CIWANAN DIKIN HEDEF'

Li goristanê hevserokê Desteya Ciwan û Werzîşê û endama Yekitiya Jinên Ciwan a herêma Firatê Xunav Xelîl axivî û destnîşan kir ku dewleta Tirk a dagirker ciwanan dike hedef, ji ber ku dizane ew bingeha civakê ne û ji wan birêxistinkirin û têkoşîn destpê dike.

'EM Ê LI PEY ŞOPA ŞEHÎDAN BIN'

Xelîl anî ziman ku PDK û civata navneteweyî berpirsên komkujiyên dewleta Tirk a dagirker ên li Bakur û Rojhilatê Sûriyê ne û wiha got: "Heta em herêmên xwe ji xayîn û sîxoran paqij bikin em ê têkoşîna xwe bilind bikin û timî li pey şopa şehîdan bin."

Di merasîmê de endamê Desteya Rêveber a Partiya Yekitiya Demokratîk (PYD) Ehmed Şêxo axivî û diyar kir ku dewleta Tirk armanc dike destkeftiyên şoreşê yên ku bi saya şehîdan pêk hatine, têk bibe.

TÊKILIYA GEL Û ŞEHÎDAN

Şêxo bilêv kir ku ew di wê baweriyê de ye ku tu kesek nikare têkiliya xurt di navbera gelê herêmê û şehîdan de qut bike û got: "Bi rêya kiryarên derexlaqî, sixortî û xayînan wan bi xapîne. Dijmin dizane ku nikare şoreşa Rojava û gelê wê yê berxwedêr tune bike. Lewra hewl dide planên xwe bi rêya kiryarên derexlaqî pêk bîn.”

Piştî axaftinan, Meclîsa Malbatên Şehîdan belgeya şehadeta şehîdan xwendin û radestî malbatên wan kirin.

Di dawiyê de girseya gel cenazeyên her du  şehîdan bi diruşmeyan sipartin axê.