Li bajarê Babê yê Bakurê Sûriyeyê ku ji aliyê çeteyên dewleta Tirk ve hatiye dagirkirin, gel rabûye ser piyan. Hate îdîakirin ku çeteyên Tirk bi çekên giran li gel reşandine û gelek ji sivîlan jiyana xwe ji dest dane û birîndar bûne. Tê gotin, komên çete yên artêşa Tirk roja 5'ê Gulanê avêtin ser Nexweşxaneya Babê û li doktoran dane. Gelê Babê jî li ber vê yekê rabû û bi qîrîna dirûşmên "Bab welatê me ye, bila leşkerên Tirk ji Sûriyeyê derkevin" daket qadan.

Artêş û çeteyên Tirk jî bi maşînên zirxî bi ser gel ve çûn û gule li sivîlan reşandin.

DI ÊRÎŞA DUYEMÎN DE JÎ 6 KES HATIN KUŞTIN

Şêniyên Babê 6'ê Gulanê jî daketin qadan û êrîş şermezar kirin. Gel ji civaka navneteweyî xwest ku pêşî li êrîşan bigirin û artêşa Tirk ji Sûriyeyê derxînin. Li gorî agahiyan leşker û çeteyên Tirk roja 6'ê Gulanê jî bi heman rengî êrîş birine ser gel û ji ber êrîşê 6 kes mirine, bi dehan kes jî birîndar bûne.

Tê gotin, leşkerên artêşa Tirk nahêlin ku gel ji bo tedawiyê birîndaran derxîne derveyî bajêr û raperîna li bajêr jî dewam dike.