Dadgeheke li Brukselê biryar wergirt ku zarokên çeteyên DAÎŞ'ê yê li Kampa El Holê divê di nava 6 hefteyan de bînin Belçîkayê. Di biryarê de hate ragihandin ku herî kêm 10 zarokên ji 4 hevjînên çeteyên DAÎŞ'ê welatiyên Belçîkayê ne.

Di biryara dadgehê de tê xwestin, ku dewleta Belçîkayê di nava dema hatiye destnîşankirin de 'alîkariya konsolos'ê bi van zarokan re bike û 'belgeyên rêveberiyê û ger û geştê' pêşkêş bike. Dadgehê biryar wergirt ku eger di nava 6 hefteyan de ev yek pêk neyê divê dewlet ji bo her roja derbas bibe 5 hezar Euro tazmînatê bide her zarokî.

Beriya niha jî li dewleta Belçîkayê hatibû ferzkirin ku zarokên çeteyên DAÎŞ'ê bînin Belçîkayê. Di biryareke cuda de ya Kanûna 2018'an hatibû xwestin ku 6 zarokên du jinên çeteyên DAÎŞ'ê bînin Belçîkayê. Lê belê hikumetê li dijî vê biryarê serî li Dadgeha Îstînafê dabû û biryar pêk neanîbû.

Lê belê bi biryareke hikumetê re ya meha Hezîranê 6 zarokên beriya niha ji aliyê mîsyonên alîkariya însanî ve hatibûn tespîtkirin û rewşa wan a tenduristiyê nebaş bû anîbûn Belçîkayê.

Tê texmînkirin ku  di nava zarokên li kampên di kontrola QSD'ê de ne tevî dayikên xwe dimînin ji 50 heta 60 zarok welatiyên Belçîkayê ne.